कुसुमटार (सिन्धुली), वैशाख १० गते । राष्ट्रिय गौरवको सुनकोशी-मरिण डाइभर्सन बहुउद्देश्यीय आयोजनाको सुरुङ खन्ने कार्य अन्तिम चरणमा पुगेको छ ।

कुल १३ दशमलव तीन किलो मिटर लम्बाईको सुरुङ अब एक सय १० किलो मिटर खन्न बाँकी रहेको र यही वैशाख २६ गते ‘ब्रेक थ्रु’ गर्ने तयारी गरिएको छ । आयोजना प्रमुख मित्र बरालले प्रधानमन्त्री पुष्पकमल दाहाल ‘प्रचण्ड’को उपस्थितीमा विषेश समारोहका बिच सुरुङ्को ‘ब्रेक थ्रु’ गर्ने तयारी गरिएको बताउनुभयो ।

सुरुङ खन्न कुनै भौगोलिक जटिलता नआए वैशाख २६ गते ‘ब्रेक थ्रु’ गर्ने तयारी गरिएको उहाँले जानकारी दिनुभयो । आयोजनाका अनुसार उक्त सुरुङ २०७९ साल असोज २८ गतेदेखि कुसुमटारबाट खन्न सुरु गरिएको थियो । टनेल बोरिङ मेशिन(टिविएम)बाट सुरुङ निर्माण कार्यका लागि चिनियाँ कम्पनी चाइना ओभरसिज इसिन्जनियरिङ (कोभेक)ले ठेक्का पाएर काम गरिरहेको छ ।

सुरुङ खन्न मात्रै कोभेकले करिब ११ अर्ब रुपियाँमा ठेक्का पाएको छ । २२ महिना सुरुङ निर्माणको काम सक्ने गरी उक्त कम्पनीले ठेक्का पाएको हो । १९ महिनामा नै सुरुङ खन्ने कार्य ९८ प्रतिशतभन्दा बढी भई सकेको र पाँच दशमलव पाँच डायमिटरको सुरुङमार्ग निर्माण गरिएको आयोजनाले जनाएको छ ।

सुरुङ खन्ने कार्य लक्ष्यभन्दा तीन महिना अगावै ‘ब्रेक थ्रु’ गर्ने तयारी गरिएको हो आयोजना प्रमुख बरालले बताउनुभयो । यस अघि टिबिएम मेसिनमाथि पहिरो खस्दा विभिन्न पटक गरी झण्डै दुई महिना सुरुङ निर्माण अबरुद्ध समेत भएको आयोजनाले जनाएको छ ।

“२०८४ सालको असोज महिनासम्म सबै प्याकेजको काम सम्पन्न गर्ने लक्ष्य सहित काम अघि बढी रहेको छ,” आयोजना प्रमुख बरालले भन्नुभयो, “पहिलो चरणको काम अन्तर्गत सुरुङ निर्माण रहेको छ । दोस्रो चरणको काम अन्तर्गत सुनकोसीमा करिब ३० मिटर आग्लो र  एक सय ५८ मिटर  लामो बाध(ब्यारेज) निर्माणको काम छ ।”

उक्त ब्यारेज निर्माण गत मङसिर महिनादेखि सुरु भएको छ । पटेल–रमण जेभीले चार वर्षमा निर्माण सम्पन्न गर्ने गरी ब्यारेज निर्माणका लागि १४ अर्ब सात करोड ५९ लाख रुपिया लागतमा २०७९ साल माघमा सम्झौता गरेको आयोजनाले जनाएको छ । आयोजनाको लागत सुरुमा करिब ४६ अर्ब रुपियाँ रहेकोमा पछिल्लो अपडेट हुदा ४९ अर्ब ४२ करोड रुपिया पुगेको आयोजना प्रमुख बरालले बताउनुभयो ।

उहाँका अनुसार सुनकोशी नदीमा वाध निर्माण गरेपछि उक्त सुरुङमार्फत् प्रतिसेकेण्ड ६७ क्युसेक पानी कमलामाई नगरपालिका–२ कुसुमटार स्थित मरिण खोलामा खसालीने छ। त्यहाँ ६६ दशमलब २९ मिटर हेटडबाट पानी झारेर ३१ दशमलब ०७ मेघावाट विद्युत उत्पादन गरिने छ ।

उत्पादित विद्युत ३७ दशमलब दुई डबल सर्किट प्रशारण लाईनमार्फत् राष्ट्रिय ग्रिड अन्तर्गत नबलपुर सबस्टेशनमा जोडिने छ । आयोजना अन्तर्गत निर्माण हुने सुरुङमार्ग, हेडोक्स र पावर हाउस निर्माण मुख्य भौतिक संरचना रहेका छन् । बहुउद्देश्यीय सो आयोजनाको मुख्य उद्देश्य विद्युत उत्पादनसँगै तराईका जिल्लामा बारा, रौतहट, सर्लाही, महोत्तरी र धनुषा जिल्लामा गरी एक लाख २२ हजार हेक्टर क्षेत्रमा सिँचाई सुविधा पु¥याउने रहेको आयोजनाले जनाएको छ ।

क्याटेगोरी : समाचार
ट्याग : #breaking, #सुनकोशी-मरिण डाइभर्सन सुरुङमार्गकाे ‘ब्रेक थ्रु' वैशाख २६ गते

---

---

---