काठमाडौँ । काठमाडौँका स्थानीय तह वित्तिय सुशासन जोखिम मूल्याङ्कनका लागि भोलि पौष १२ गतेदेखि २० गतेसम्म जिल्ला समन्वय समिति काठमाडौँका प्रमुख सन्तोष बुढाथोकीको नेतृत्वमा पालिकामा गएर अनुगमन गर्ने जनाइएको छ । जिल्ला समन्वय समिति काठमाडौँले आज ” स्थानीय तह वित्तिय सुशासन जोखिम मूल्याङ्कन अभिमुखीकरण” कार्यक्रमको आयोजना गरी सो कुरा बताइएको हो ।

स्थानीय तह वित्तिय सुशासन जोखिम मूल्याङ्कन अभिमुखीकरण कार्यक्रमलाई सम्बोधन गर्दै जिल्ला समन्वय समिति काठमाडौँका प्रमुख सन्तोष बुढाथोकीले स्थानीय तहहरू कुन अवस्थामा छन् ? कुन पालिकाको कुन पक्ष बलियो छ ? कुन पक्ष कमजोर रहेको छ ? यसलाई सूचित गर्ने काम स्थानीय तह वित्तिय सुशासन जोखिम मूल्याङ्कनले गर्ने बताए । उनले यसले कमजोरीलाई सच्याउँदै सबल पक्षलाई बढावा दिन सहज हुने पनि बताए । स्थानीय तहले कानुनी र व्यवहारिक रूपमा कार्य सम्पादन गरेका कुराहरूको डकुमेन्टेसन भएमा सुशासन कायम गर्न पनि सहयोग हुने समन्वय प्रमुख बुढाथोकीको भनाइ थियो ।

काठमाडौँ जिल्ला समन्वय अधिकारी शिवप्रसाद रिजालले स्थानीय तह वित्तिय सुशासन जोखिम मूल्याङ्कनका लागि कार्ययोजना बनाएर नै अगाडि बढिने बताए । यसबाट जिल्ला समन्वय समितिले राम्ररी समन्वय गरेको रहेछ या रहेनछ भन्ने गुनासो या प्रशंसा दुवै थाहा पाउन सकिने पनि समन्वय अधिकारी शिवप्रसाद रिजालको भनाइ थियो ।

स्थानीय तह वित्तिय सुशासन जोखिम मूल्याङ्कन संघीय मामिला मन्त्रालयको कार्यक्रम हो । यसले वित्तिय सुशासन प्रणालीलाई जिम्मेवार, पारदर्शी, नतिजामुखी एवं उत्तरदायी बनाउन महत्वपूर्ण भूमिका खेल्ने भए पनि छलफल गर्ने तर कार्यान्वयनको पाटो फितलो रहेको सहभागीको भनाइ थियो । यसलाई व्यवहारमा उतार्न र उपलब्धीमूलक बनाउन जिल्ला समन्वय समिति काठमाडौँले भने सक्रिय रूपमा अगाडि बढ्ने बताएको छ । कार्यक्रममा काठमाडौँ महानगरलगायत काठमाडौँ जिल्लाका सबै पालिकाका प्रमुख प्रशासकीय अधिकृत/फोकल पर्सनको सहभागिता रहेको थियो ।

क्याटेगोरी : समाचार
ट्याग : #'hot, #जिल्ला समन्वय समिति काठमाडौं

---

---

---