५महिनामा ८२ किलो सुन

साझापाना २०८० मंसीर २५ गते १२:१३ मा प्रकाशित

काठमाडौँ । त्रिभुवन अन्तर्राष्ट्रिय विमानस्थल भन्सार गेट बाहिरबाट गत साउन ३ मा ६० किलो सुन बरामद गरिएको थियो । राजस्व अनुसन्धान विभागले बरामद गरेको सो सुनबारे अहिले सुनको अवैध पैठारी (तस्करी) नियन्त्रण सम्बन्धी जाँचबुझ आयोगले छानबिन गरिरहेको छ ।

६० किलो सुन बरामद भएको ५ महिना पुग्दै छ । यो अवधिमा भन्सार कार्यालय र प्रहरीले विमानस्थलबाट थप दुई पटक ठुलो परिमाणमा तस्करीको सुन बरामद गरेका छन् । मङ्सिर २१ गते राति त्रिभुवन विमानस्थल भन्सार कार्यालयका प्रमुख भन्सार प्रशासक डा. टोकराज पाण्डे आफैँ विमानस्थलको एप्रोन एरियामा पुगेर गोरखाका चन्द्र्र घलेलाई नियन्त्रणमा लिए । दुबईबाट आएका ४५ वर्षीय घलेले ज्याकेटमा लुकाएर ल्याएको अवस्थामा १४ किलो सुन भेटियो ।

शनिबार राति विमानस्थलबाट साढे ६ किलो सुनसहित इजिप्टका सरिफ मोहम्मद लासिम पक्राउ परे । दुबईबाट काठमाडौँ ओर्लिएका उनलाई भन्सार एरिया पार गरिसकेको अवस्थामा पक्राउ गरिएको विमानस्थल सुरक्षा कार्यालयका डीआईजी अर्जुन चन्द ठकुरीले बताए । दुई दिनमा मात्र साढे २० किलो तस्करीको सुन विमानस्थलमा आएको छ ।

क्याटेगोरी : अर्थ, समाचार