नवराज विकसहित ६ जनाको हत्या भएको सोती हत्याकाण्डको बहस सकियो, आजै फैसला आउने

साझापाना २०८० मंसीर १९ गते १५:४१ मा प्रकाशित

काठमाडौं, १९ मंसिर । रूकुम पश्चिम चौरजहारी नगरपालिका-८ सोतीगाउँमा अन्तरजातीय प्रेम सम्बन्धका कारण नवराज विकसहित ६ जनाको हत्या भएको सोती हत्याकाण्डको सुनुवाई सकिएको छ ।

रूकुम पश्चिमका जिल्ला न्यायाधीश खड्गबहादुर केसीको इजलासमा आइतबारदेखि सुरु भएको निरन्तर सुनुवाइमा वादी र प्रतिवादी पक्षका वकिलको बहस सकिएको हो । दुई/दुईजना जिल्ला सरकारी वकिल र उच्च सरकारी वकिलसहित २४ जनाले बहस गरेका छन् । आज साँझसम्म फैसला आउने बताइएको छ ।

२०७७ जेठ १० गते जाजरकोटको भेरी नगरपालिका-४ रानागाउँका २१ वर्षीय नवराज विक आफ्ना साथीसहित मल्ल थरकी प्रेमिकालाई भगाएर बिहे गर्न रुकुम पश्चिमको चौरजहारी नगरपालिका- ८ सोतीगाउँमा पुगेकामा नवराजसहित ६ जनाको हत्या भएको थियो ।

हत्या हुनेमा विकसहित उनका साथीहरू सन्दीप विश्वकर्मा, टीकाराम सुनार, लोकेन्द्र सुनार, गणेश बुढा र गोविन्द शाही हुन् ।

क्याटेगोरी : समाचार, समाज