प्रहरीले फेला पारेको ९ लाख रुपैयाँ सम्बन्धित व्यक्तिलाई जिम्मा लगायो

प्रहरी अनुसन्धानले सो रकम महतोकै हो भनी एकिन भएपछि रकम हस्तान्तरण गरिएको ईलाका प्रहरी कार्यालय बर्दिबासले जनाएको छ । एक महिना अगाडि राति इलाका प्रहरी कार्यालय गौरीडाँडाको प्रहरी बिट भोला वसन्त चोकबाट प्रहरी जवान अजय मण्डल पेट्रोलिङ गर्ने क्रममा सो रकम फेला पारेको कार्यालय प्रमुख विजयकुमार महतोले जानकारी दिए ।

प्रहरीले पैसा गन्ने क्रममा सो पैसाको बीचबीचमा महतो किराना पसलका केही बिलसमेत भेटिएका थिए । पछि रकम महतो किराना पसलकै पैसा हुन सक्ने ठोस आधारहरू देखिएको र यसबीचमा कसैले पनि दावी नगरेपछि रकम उनकै निष्कर्षमा पुगेको इलाका प्रहरी कार्यालय बर्दिबासले जनाएको छ ।

प्रहरीबाहेक अरूले भेट्टाएको भए भेट्न असम्भव हुने पसल सञ्चालक जगदीश महतोले बताए । उनले २५ हजार रुपैयाँ बराबरको प्रहरी संरचना बनाइदिने घोषणा गरेका छन् । प्रहरी सर्वसाधारणको साथी मात्र होइन, गतिलो भरोसा पनि हो भन्ने विषयलाई प्रहरी जवानले देखाएको जिम्मेवारीप्रतिको इमानले प्रमाणित गरेको स्थानीय बताउँछन्।