विराटनगर : विराटनगरबाट लागूऔषध गाँजासहित आइतबार दिउँसो २ जना पक्राउ परेका छन्। पक्राउ परेकाको साथबाट प्रहरीले ६ किलो ६० ग्राम गाँजा बरामद गरेको छ।

भारततर्फ गाँजा लैजाँदै गरेको अवस्थामा विराटनगर महानगरपालिका–८ का २५ वर्षीय विवेक राय र २२ वर्षीय सुरज रायलाई पक्राउ गरिएको मोरङ प्रहरी प्रहरीका प्रवक्ता डीएसपी रन्जनकुमार दाहालले जानकारी दिए। पैदल रहेका दुवै जनालाई लागूऔषध नियन्त्रण ब्यूरो विराटनगरको टोलीले विराटनगर–१४ बाट यादव टोलबाट पक्राउ गरेको हो।

बोरामा प्याक गरिएको गाँजा काँधमा बोकेर नेपालबाट भारततर्फ लैजाँदै गर्दा उनीहरुलाई पक्राउ गरिएको डीएसपी दाहालले बताए। शंका लागेर प्रहरीले खानतलासी गर्दा बोराभित्र गाँजा फेला परेको थियो। पक्राउ परेकाहरुलाई इलाका प्रहरी कार्यालय रानीमा राखेर थप अनुसन्धान अघि बढाइएको छ।

यसैबीच, विराटनगर–१५ स्थित १ नम्बर ढाटबाट लागूऔषध ब्राउन सुगर (खैरो हेरोइन)सहित एक जनालाई प्रहरीले आइतबार बिहान पक्राउ गरेको छ। पक्राउ पर्नेमा सुनसरीको इटहरी उपमहानगरपालिका–४ का ३७ वर्षीय प्रदीप यादव रहेका छन्।

भारतको जोगवनीबाट ब्राउन सुगर लिएर नेपालतर्फ आउँदै गरेको अवस्थामा लागूऔषध नियन्त्रण ब्युरोको टोलीले यादवलाई पक्राउ गरेको डीएसपी दाहालले बताए। उनका अनुसार शंका लागेपछि पैदल रहेका यादवलाई नियन्त्रणमा लिएर खानतलासी गर्दा साथबाट ९० मिलिग्राम ब्राउन सुगर बरामद भएको हो।

यादवलाई इलाका प्रहरी कार्यालय रानीको हिरासतमा राखिएको छ। उनीविरुद्ध लागूऔषध ऐनअन्तर्गतको मुद्दा चलाउन अदालतबाट म्याद थप गरेर अनुसन्धानको बाँकी प्रक्रिया अघि बढाइएको प्रहरीले जनाएको छ।

क्याटेगोरी : ब्रेकिंग न्युज, समाचार

---

---

---