काठमाडौं, ११ असोज : नेकपा एमालेको प्रथम बागमती प्रदेश कमिटीको अधिवेशनको निर्वाचन प्रक्रियाअन्तर्गत मनोनयन दर्ता गरेका उम्मेदवारले फिर्ता लिने क्रम जारी रहेको छ ।

एमाले केन्द्रीय कार्यालय ललितपुर च्यासलमा जारी निर्वाचन प्रक्रियाका लागि पूर्व निर्धारितभन्दा एक दिन ढिलो गरी उम्मेदवारी फिर्ताको क्रम चलेको हो ।

निर्वाचन समितिका सदस्य ताराकुमार श्रेष्ठका अनुसार कूल २४० पदका लागि प्राप्त ५४८ उम्मेदवारमध्ये सहमतिका आधारमा हालसम्म करिब ३०० जनाले उम्मेदवारी फिर्ता लिइसकेका छन् ।

फिर्ता लिने प्रक्रिया सकिएपछि उम्मेदवारको अन्तिम नामावली प्रकाशन गरी विद्युतीय मतदान मेसिनका उम्मेदवारको विवरण प्रविष्ट गरेपछि निर्वाचन सुरू हुने छ ।

कमिटीको अध्यक्ष पदका लागि कैलाश ढुङ्गेल, कृष्णप्रसाद दाहाल, सानुकुमार श्रेष्ठ, केशर बुढाथोकीले उम्मेदवारी दिएका छन् । अध्यक्ष पदमा उम्मेदवारी दिएका केशवराज पाण्डेले भने उम्मेदवारी फिर्ता लिएका छन् ।

यही असोज ८ गते भृकुटीमण्डपमा एमालेका अध्यक्ष एवं पूर्वप्रधानमन्त्री केपी शर्मा ओलीबाट उद्घाटन भएको अधिवेशनको बन्दसत्र कमलादीस्थित नेपाल प्रज्ञा प्रतिष्ठानमा मङ्गलबार सम्पन्न भएको थियो ।

नयाँ कार्यसमितिका लागि साँझ ६ बजेदेखि निर्वाचन हुँदै

संशोधित कार्यतालिका अनुसार बिहीबार साँझ ६ बजदेखि निर्वाचन गर्नेगरी कार्यक्रम तय भएको प्रमुख निर्वाचन अधिकृत डिल्ली मैनालीले जानकारी दिए । नयाँ नेतृत्व छान्नका लागि हुन लागेको निर्वाचनको यसअघि पनि कार्यतालिका संशोधन हुँदै आएको छ ।

निर्वाचन समितिको प्रमुखमा अधिवक्ता डिल्ली मैनाली छन् ।

क्याटेगोरी : समाचार
ट्याग : #breaking, #नेकपा एमाले

---

---

---