प्रधानमन्त्री पुष्पकमल दाहाल चीन भ्रमणको क्रममा बेइजिङबाट चोङछिङ नगर पुग्नुभएको छ । उहाँसँग चिनियाँ कम्युनिष्ट पार्टीको उक्त नगर कमिटीका सचिव तथा केन्द्रीय समितिको राजनीतिक ब्युरो सदस्य युआन जियाजुनले शिष्टाचार भेट गर्नुभएको छ ।

भेटमा प्रधानमन्त्री नेतृत्वको नेपाली टोली र चिनियाँ प्रतिनिधिमण्डलको उपस्थिति रहेको बताइएको छ ।

हिजो चिनियाँ प्रधानमन्त्री लि छ्याङसँग भएको भेटवार्ता र द्विपक्षीय छलफलपछि आज बिहान संयुक्त वक्तव्य जारी गरिएको छ । उहाँ कृषिसम्बन्धी एकेडेमीको अवलोकन गर्न चोङछिङ जानुभएको हो । कृषिको व्यावसायीकरण र औद्योगीकरणबारे जानकारी लिन जानुभएका प्रधानमन्त्रीले त्यहाँको खेत र कृषिको समेत अवलोकन गर्नुभएको छ ।

प्रधानमन्त्री दाहाल र उहाँको टोलीको सम्मानमा चोङछिङका सचिव जियाजुनले रात्रिभोजको आयोजना गर्नुभएको छ । उहाँ भोलि ल्हासा जाने त्यसको भोलिपल्ट कैलाश पर्वत घुमेर आगामी शनिबार छन्तु हुँदै स्वदेश फर्कने कार्यक्रम छ ।

ल्हासामा रहँदा त्यहाँ पनि चिनियाँ कम्युनिष्ट पार्टीका प्रान्तीय नेताहरुसँग भेटघाट हुने बताइएको छ ।

उहाँ गत शनिबार अमेरिकाको न्युयोर्कबाट सोझै हाङ्चौ पुग्नुभएको हो । सोही दिन राष्ट्रपति सि जिनपिङसँग शिष्टाचार भेट गरेपछि राति १९ औं एसियाली खेलकुदको उद्घाटन समारोहमा सहभागी हुनुभएको थियो ।

क्याटेगोरी : समाचार
ट्याग : #hot, #पुष्पकमल दाहाल

---

---

---