नेपाल उद्योग परिसंघ ९सिएनआई० र चाइना काउन्सिल फर प्रमोसन अफ इन्टरनेशनल ट्रेड (सीसीपीआईटी) बीच आपसी लगानी तथा द्विपक्षीय सहकार्य प्रवर्द्धन गर्न नेपाल–चीन व्यवसाय परिषद् (नेपाल चाइना विजनेस काउन्सिल) स्थापना गर्ने समझदारी भएको छ ।

प्रधानमन्त्री पुष्पकमल दाहाल प्रचण्डको चीन भ्रमणको अवसरमा यस्तो समझदारी भएको हो । समझदारी पत्रमा सिएनआईका अध्यक्ष राजेशकुमार अग्रवाल र सीसीपीआईटीका उपाध्यक्ष चाङ साओगाङले हस्ताक्षर गरेका छन् ।

समझदारीसँगै नेपाल चाइना बिजनेस काउन्सिलमार्फत द्विपक्षीय आर्थिक सहयोग अभिवृद्धि गर्ने, व्यापार तथा लगानीका अवसरहरुको पूर्ण सम्भावनाको सदुपयोग गर्ने र नेपाल चीन दुबैका व्यवसायिक समुदायको विकासका लागि सहजीकरणमा सहजता आउने विश्वास गरिएको छ । काउन्सिलले दुई देशबीच व्यवसायिक गतिविधिहरूलाई सुव्यवस्थित गर्न, अनुसन्धान र अध्ययन–सम्बन्धित पहलहरू सञ्चालन गर्न, लगानी अभिबृद्धिका लागि नेटवर्किङका अवसरहरू सिर्जना गर्न, व्यवसायिक भ्रमण आदानप्रदान गर्न, सम्मेलन तथा संवादलगायतका गतिविधि गर्नेछ । यी लक्ष्य प्राप्त गर्न परिसंघ र सीसीपीआईटीले काउन्सिलको गठन सहित सहकार्यको रोडम्याप पनि तयार पारेका छन् ।

काउन्सिलमा चार सदस्य रहने र दुवैतर्फबाट समान प्रतिनिधि रहने जनाइएको छ । परिसंघका अध्यक्ष अग्रवालले नेपाल र चीनबीच व्यवसायिक सम्बन्ध अभिबृद्धिसँगै चिनियाँ लगानी तथा प्रविधि भित्र्याउन काउन्सिल महत्वपूर्ण माध्यम बन्ने विश्वास व्यक्त गरे । काउन्सिलले देखिने गरी प्रभावकारी रुपमा काम गर्ने उनले दावी पनि गरेका छन् ।

समझदारी हस्ताक्षर कार्यक्रममा परिसंघका तर्फबाट निवर्तमान अध्यक्ष विष्णुकुमार अग्रवाल, उपाध्यक्षहरु निर्वाण चौधरी, भीम घिमिरेसमेत सहभागी थिए ।

यता, प्रधानमन्त्री प्रचण्डले स्थानीय समयअनुसार आज साँझ चार बजे नेपाली र चिनियाँ व्यापारीहरुले संयुक्त रुपमा आयोजना गर्ने चाइना(नेपाल इन्भेष्टमेन्ट फोरमलाई सम्बोधन गर्ने कार्यक्रम छ । त्यसका निम्ति नेपालबाट उध्योग वाणिज्य संघ,चेम्बर अफ कमर्स,उध्योग परिसंघका अध्यक्षसहित ठूलो संख्यामा व्यापारीहरु बेइजिङ पुगेका छन् ।

क्याटेगोरी : समाचार
ट्याग : #breaking, #नेपाल-चाइना विजनेस काउन्सिल

---

---

---