देशभरका स्वास्थ्य संस्था ठप्प

साझापाना २०८० भदौ ३१ गते १०:१८ मा प्रकाशित

काठमाडौं । चिकित्सक कुटिएको विरोधमा आज देशभरका स्वास्थ्य संस्थामा चिकित्सकहरुले आकस्मिकबाहेकका सबै सेवा ठप्प पारेका छन् । नेपाल चिकित्सक संघको आह्वानमा चिकित्सकहरु हड्तालमा उत्रिदा बिरामीहरु अत्यावश्यक उपचार सेवा पाउनबाट बञ्चित भएका छन् ।

उपचारका लागि अस्पताल पुगेका बिरामीहरु गेटबाटै फर्कन बाध्य भएका छन् । चिकित्सकहरुले आकस्मिकबाहेकका सबै सेवा ठप्प पार्दा बिरामीहरुले ओपीडी सेवा नपाएका हुन् ।

देशभरका सबै सरकारी स्वास्थ्य संस्था, अस्पताल, मेडिकल कलेज, निजी अस्पताल तथा क्लिनिकहरुमा आकस्मिकबाहेकका सबै स्वास्थ्य सेवा पूर्ण रुपमा बन्द गरिएको छ ।

गत बुधबार हेटौंडाको सन्चो अस्पतालमा कार्यरत डा। विकास थापा र डा। प्रशान्त विडारीमाथि बिरामीका आफन्तहरूबाट भएको कुटपिटको घटनामा संलग्नहरूलाई पक्राउ गरी कारबाहीको माग गर्दै चिकित्सक संघले आन्दोलनका कार्यक्रम घोषणा गरेको हो ।

स्थानीय सुरक्षा निकाय, जिल्ला प्रशासन कार्यालय, जिल्ला प्रहरी कार्यालयका जिम्मेवार व्यक्तिले नै मेलमिलापको बाहनामा घटनालाई निस्तेज पार्न खोजेको संघको आरोप छ । ती निकायमाथि पनि छानबिन गर्न संघले माग गरेको छ ।

क्याटेगोरी : समाचार
ट्याग : #देशभरका स्वास्थ्य संस्था ठप्प