कान्ती बाल अस्पतालको लापरबाही बाट पिडित बालिकाको परिवार भेट्न महेश वर्तौला थाहा नगरपालिका नुलगाउँमा

बालिकाको परिवार भेट्न नुलगाउँमा एमाले सचेतक महेश वर्तौला कान्ती बाल अस्पतालको लापरबाही बाट लगातार ज्वरो र वान्ताले थलिएकी रेजिशा गोपालीको ज्यान गएकोमा सदनमा न्याय मागिरहेका छन् । यसै विचमा वर्तौला बालिकाको हजुबुबा तथा आमा र परिवार भेट्न मकवानपुरको थाहा नगरपालिका १० स्थित घरैमा पुग्नु भएको हो ।

साँसद वर्तौलाले २२ गते प्रतिनिधि सभाको बैठकमा बोल्नुहुँदै घटनाले अस्पतालभित्रको बेथिति झल्काएको र निर्देशकले जिम्मा लिनुपर्ने बताउनु भएको थियो । ‘वैदेशिक रोजगारीमा पोर्चुगल गएको बुवाको सपना कान्ति बाल अस्पतालको लापर्बाहीका कारण चकनाचुर भयो,’ सदनमा उहाँले भन्नु भयो, ‘चरम गैरजिम्मेवारीपनले पाँच वर्षको बच्चाको मृत्यु भयो । यसले अस्पतालभित्रको बेथिति देखाउँछ । निर्देशक र अस्पताल विकास समितिले यसको जिम्मेवारी लिनुपर्छ । स्वास्थ्यमन्त्रीले जवाफ दिनुपर्छ ।

पीडितलाई अविलम्ब न्याय र क्षतिपूर्ति दिनुपर्ने माग गर्दछु ।’ उहाँको सचिवालयले दिएको जानकारीका अनुसार सचेतक वर्तौलाले हिजो शनिवार विहान करिव ८ः०० बजेको समयमा मकवानपुरको थाहा नगरपालिका १० स्थित गोपालीको घरैमा पुगेर परिवारलाई भेट्नु भएको हो ।