सुदूरपश्चिम प्रदेशसभाको अधिवेशन भोलिदेखि शुरु हुने

साझापाना २०७९ पुस १७ गते १३:५४ मा प्रकाशित

धनगढी । सुदूरपश्चिम प्रदेशसभाको अधिवेशन भोलिदेखि शुरु हुने भएको छ ।

प्रदेश प्रमुख देवराज जोशीले भोलि पुस १८ गते दिउसो १ः०० बजेदेखि शुरु हुने गरि प्रदेशसभा अधिवेशन आह्वान गर्नुभएको प्रदेशसभा सचिवालयले जनाएको छ ।

ज्येष्ठ सदस्य मानबहादुर रावलको अध्यक्षतामा प्रदेशसभाको पहिलो बैठक बस्ने कार्य तालिका रहेको छ ।

प्रदेशसभा सचिव देवबहादुर बोगटीले प्रदेशसभाको दोस्रो कार्यकालको (अधिवेशन) पहिलो बैठक सञ्चालनका लागि सम्पूर्ण तयारी पूरा भएको बताउनुभयो । भोलिको बैठकमा सभामुख र उपसभामुख चयन लगायतका विषयमा कार्यसूची पेश गर्ने तयारी रहेको र त्यसका लागि आज सर्वदलीय बैठक डाकिएको उहाँले बताउनुभयो ।

५३ सदस्यीय प्रदेशसभामा कुनै दलको स्पष्ट बहुमत नहुँदा मिलीजुली सरकार बन्ने देखिन्छ । सरकार बनाउन बहुमतका लागी २७ जना आवश्यक पर्छ ।

यहाँ नेपाली काँग्रेस १९ जना प्रदेशसभा सदस्यसहित पहिलो दल रहेको छ । यस्तै, नेकपा माओवादी केन्द्र ११ जना, नेकपा एमाले १०, नागरिक उन्मुक्ति पार्टी ७ जना, नेकपा एकीकृत समाजवादी ४ जना, राप्रपा १ र स्वतन्त्रबाट १ जना प्रदेशसभा सदस्य हुनुहुन्छ ।

क्याटेगोरी : समाचार
ट्याग : #सुदूरपश्चिम प्रदेश