गोरखा। चम्पावती जलविद्युत आयोजनाका कारण राइनासटारको १२०० हेक्टर खेत सुख्खा लाग्ने भन्दै किसानहरुले सो आयोजनाको कार्यालय तोडफोड तथा सवारी साधनमा आगजनी गरेका छन् ।

शनिबार कार्यालय परिसरमा पुगेका पाँचसय जना भन्दा धेरै स्थानीय किसानले जलविद्युत आयोजना कार्यालयमा आक्रमण गरेका घटनाका प्रत्यक्षदर्शी सुजन न्यौपानेले जानकारी दिए ।

राइनासटार सिँचाइ आयोजनाको बाँधभन्दा दुईसय मिटर तल जलविद्युत आयोजनाको निकास हुँदा खेतमा सुख्खा लाग्ने हुँदा बाँध माथि निकास हुने गरी आयोजना बनाउन लामो समयदेखि किसानहरुले माग गरिरहेका थिए ।

तर निर्माण कम्पनीले किसानहरुको माग सम्बोधन नगरेको भन्दै किसानहरु आक्रोशित भएका उनको भनाइ छ । आक्रोशित किसानहरु शनिबार दिउसो १ बजेतिर सो हाइडूो पावर कम्पनीको सिरानचोक गाउँपालिका (२ पाण्डेवेशीस्थित कार्यालयमा पुगेका थिए । आन्दोलनको क्रममा उछृङ्खल समूहले कार्यालयमा तोडफोड र सवारी साधनमा आगजनी गरेका हुन् ।

आक्रमणबाट आयोजनाको एउटा कार्यालय भवन तोडफोड भएको, दुईवटा मोटरसाइकल तथा एउटा मिनीटूक र एउटा एक्साभेटर जलाएर पूर्ण रुपमा नष्ट गरेका गोरखाका प्रहरी प्रमुख एसपी केदार खनालले जानकारी दिए ।

आक्रमणबाट चार, पाँच करोड बराबरको क्षति भएको चम्पावती जलविद्युत आयोजनाका प्रवद्र्धक हरेराम ढकालले बताए । ‘बाँधभन्दा माथि नै निकास खस्छ । तर कसैको उक्साहटमा किसानहरु त्यसरी अराजक भएर आउनु दुखद भयो’, उनले भने, ‘अब हामी क्षतिपूर्ति र कारबाहीका लागि अघि बढ्छौँ ।’

प्रहरीले घटनाको अनुसन्धान गरी घटनामा संलग्नको खोजी कार्य गरिरहेको एसपी खनालले बताए । दरौँदी दैनिक

क्याटेगोरी : समाचार
ट्याग : ##गोरखा, #चम्पावती जलविद्युत आयोजना

---

---

---