निर्वाचन शान्तिपूर्ण रुपमा सम्पन्न हुन्छ : बालकृष्ण खाण

रुपन्देही । गृहमन्त्री बालकृष्ण खाणले स्थानीय पालिकाको निर्वाचन सम्पन्न गर्न सबैको सहयोग रहेकाले आगामी निर्वाचन पनि सबैको सहयोगमा शान्तिपूर्ण रुपमा सम्पन्न हुने बताउनुभएको छ ।

आगामी निर्वाचनको सुरक्षा तयारीका लागि लुम्बिनी प्रदेशस्तरीय सुरक्षा बैठकमा गृहमन्त्री खाणले नागरिकको जीवन रक्षा गर्नु सरकारको पहिलो दायित्व भएको बताउँदै नागरिकको सुरक्षा र सम्पत्तिको रक्षाका लागि सरकार सधैँ प्रतिबद्ध रहेको उल्लेख गर्नुभयो ।

उहाँले आगामी निर्वाचन राष्ट्रसेवक कर्मचारी, सुरक्षा निकायसँगको समन्वयमा प्रतिनिधिसभा र प्रदेशसभाको निर्वाचन भयरहित वातावरणमा सम्पन्न हुने बताउनुभयो ।

गृहमन्त्री खाणले नागरिकको जीवन र सम्पत्तिको रक्षा गर्ने कार्यमा सुरक्षा निकायले २४ सै घण्टा खटेर महत्त्वपूर्ण भूमिका निर्वाह गरेको भन्दै नेपाली सेना, नेपाल प्रहरी, सशस्त्र प्रहरी बल नेपाल र  राष्ट्रिय अनुसन्धान विभागलाई धन्यवाद समेत दिनुभयो ।

“सीमित स्रोत साधनका बाबजुद विषम परिस्थितिमा पनि सुरक्षा निकायले खेलेको भूमिका प्रशंसनीय छ”, उहाँले भन्नुभयो ।

सुरक्षा बैठकमा प्रदेशको सुरक्षा अवस्था र आगामी निर्वाचनबारे छलफल हुनेछ ।

बैठकमा १२ जिल्लाका प्रमुख जिल्ला अधिकारी तथा सुरक्षा निकायका प्रमुखहरूको प्रस्तुति रहने रुपन्देहीका प्रमुख जिल्ला अधिकारी भरतमणि पाण्डेले जानकारी दिनुभयो ।

बैठकमा लुम्बिनी प्रदेशका मुख्यमन्त्री कुलप्रसाद केसी, कानुन मन्त्री तिलकराम शर्मा, प्रदेशका १२ वटै जिल्लाका विभिन्न सुरक्षा निकायका प्रमुख तथा प्रतिनिधिहरू र प्रमुख जिल्ला अधिकारीहरूको सहभागी हुनुहुन्छ ।