काठमाडौं । वीर अस्पतालले मिर्गौला रोगीको उपचारका क्रममा चरम लापरबाही गरेका घटना सार्वजनिक भएको छ ।

धादिङको गल्छी गाउँपालिका–२ की ३५ वर्षीया चमेली गैरेको मिर्गौलामा समस्या देखिएपछि प्रत्यारोपणका लागि वीर अस्पतालमा पुगेका थिए । उनलाई उनकी ५८ वर्षीया सासूले मृगौला दिएकी थिइन् ।

गत मंगलबार मृगौला प्रत्यारोपण गर्ने मिति तय भएसँगै चिकित्सकहरुले सासूको मिर्गौला निकालेका थिए । तर जब मिर्गौला निकालियो एकाएक चिकित्सकहरु प्रत्यारोपण गर्न नसक्ने भन्दै निकालिएको मिर्गौला यतिकै छाडेर भागे ।

चिकित्सकहरुले मिर्गौला प्रत्यारोपण गर्न लागिएकी बुहारी चमेलीको नसामा समस्या रहेको भन्दै भागेको उनका आफन्तले बताएका छन् । जबकी प्रत्यारोपण गर्नुअघि सासू बुहारी दुवै जनाको अस्पतालले स्वास्थ्य परिक्षण गरेको थियो । परिक्षणका क्रममा दुवैको स्वास्थ्य अवस्था ठिक थियो । तर, अन्त्यमा मृगौला निकालिसकेपछि बुहारीमा प्रत्यारोपण गर्ने समयमा चिकित्सकहरु भागेका हुन् ।

चिकित्सक भागेपछि सासूबाट निकालिएको मिर्गौला पनि काम नलाग्ने भएको छ । अस्पतालको लापरबाहीपछि बिरामीका आफन्त आन्दोलित भएका छन् ।

अस्पतालले पनि घटनाको छानबिनका लागि समिति गठन गरेको छ । डा. प्रवीण श्रेष्ठको संयोजकत्वमा समिति गठन गरिएको अस्पतालले जनाएको छ । समितिको प्रतिवेदन आएपछि थप निर्णय लिइने अस्पतालले जनाएको छ ।

क्याटेगोरी : समाचार, स्वास्थ्य
ट्याग : #वीर अस्पताल

---

---

---