माओवादी केन्द्रकी दोलखा जिल्ला इन्चार्ज देवी खड्काले दिइन् राजीनामा

साझापाना २०७९ कात्तिक २ गते १६:१७ मा प्रकाशित

काठमाडौं । नेकपा माओवादी केन्द्रकी दोलखा जिल्ला इन्चार्ज देवी खड्काले राजीनामा दिएकी छन् । स्वास्थ्यको कारण देखाउँदै खड्काले पार्टी हेडक्वार्टरसमक्ष राजीनामा दिएकी हुन् ।

माओवादी केन्द्रीय सदस्य तथा पूर्वमन्त्री खड्का दोलखाबाट प्रतिनिधिसभा सदस्यको उम्मेदवारको प्रमुख दाबेदार थिइन् । पार्टीले गंगा वहादुर कार्कीलाई उम्मेदवार बनाएपछि उनले अध्यक्ष प्रचण्डलाई भेटेर राजीनामा बुझाएकी हुन् ।

खड्का २०६४ सालको पहिलो संविधानसभामा माओवादीबाट निर्वाचित भएकी थिइन् । खड्का पार्टीबाट प्रत्यक्ष निर्वाचन लड्न सक्षम र योग्य महिला भए पनि उनीमाथि न्याय नभएको निकटस्थहरुको गुनासो छ ।

उनका पति राजकुमार श्रेष्ठ यसअघि नै राजनीतिबाट विरक्तिएर कृषिमा लागि सकेका छन् । श्रेष्ठ पनि २०६४ सालमा सिन्धुपाल्चोक १ बाट संविधानसभा सदस्य निर्वाचित भएका थिए ।

क्याटेगोरी : समाचार
ट्याग : #देवी खड्का, #माओवादी केन्द्रकी दोलखा जिल्ला इन्चार्ज देवी खड्काले दिइन् राजीनामा