सत्तागठबन्धनले जारी गरेको विज्ञप्तिप्रति लोसपाको आपत्ति

साझापाना २०७९ असोज २७ गते १४:२५ मा प्रकाशित

काठमाडौ । सत्तागठबन्धनले बुधबार जारी गरेको विज्ञप्तिप्रति लोकतान्त्रिक समाजवादी पार्टी (लोसपा)ले आपत्ति जनाएको छ। गठबन्धनका चार घटकले केही उम्मेदवारको प्रष्टीकरण गर्ने उद्देश्यले जारी गरेको विज्ञप्तीप्रति गम्भीर ध्यानाकर्षण भएको सो पार्टीले जनाएको छ।

बुधबार कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल प्रचण्ड, एकीकृत समाजवादी अध्यक्ष माधव नेपाल र राष्ट्रिय जनमोर्चा उपाध्यक्ष दुर्गा पौडेलले विज्ञप्ती जारी गर्दै सर्लाही २ मा गठबन्धनका महिन्द्रराय यादव साझा उम्मेदवार रहेका जनाएका थिए।

बाबुराम भट्टराई नेतृत्वको नेपाल समाजवादी पार्टीका नेता यादव माओवादी केन्द्रबाट उम्मेदवार बनेका छन्। सत्तागठबन्धनकाे उक्त विज्ञप्ती कांग्रेस सभापति देउवासँग आश्विन २२ मा भएको सहमतिविपरीत रहेको लोसपाको ठहर छ।

लोसपाले सर्लाही २ मा मित्रवत प्रतिष्पर्धा गर्ने, सर्लाही २ (क)मा कांग्रेसको उम्मेदवार हुने तथा सर्लाही २ (ख), सर्लाही १ (क), महोत्तरी १ (क) र महोत्तरी २ (क)मा लोसपाको उम्मेदवार हुने सहमति भएको जनाएको छ।

क्याटेगोरी : समाचार
ट्याग : #लोकतान्त्रिक समाजवादी पार्टी, #सत्तागठबन्धन, #सत्तागठबन्धनले जारी गरेको विज्ञप्तिप्रति लोसपाको आपत्ति