डा. गोविन्द केसी अनसन बस्न धनगढी पुगे

साझापाना २०७९ भदौ २७ गते १३:१३ मा प्रकाशित

काठमाडौं । चिकित्सा शिक्षा सुधारको लागि सक्रिय डा. गोविन्द केसी अनसन बस्न धनगढी पुगेका छन् । यसअघि केसीले ७ बुँदे माग अघि सारेका थिए । सरकारले आफूले दिएको समयमा पनि मागबारे कुनै सुनुवाई नगरेकोले उनी अनसन बस्न आज (सोमबार) धनगढीतर्फ प्रस्थान गरेको उनको सचिवालयले जनाएको छ ।

केसीका सहयोगी प्रितम सुवेदीले लेखेका छन्–‘सरकारले दुई साता समय मागेर पनि मागहरु पूरा नगरेकाले ७ बुँदे मागसहित आज साँझ ५ बजेदेखि सत्याग्रह शुरु गर्न डा केसी धनगढी जाँदै हुनुहुन्छ ।’ यसअघि डा. केसीले भदौ १२ गते पत्रकार सम्मेलन गर्दै ७ बुँदे मागसहित अनसनको घोषणा गरेका थिए ।

उनले अघि सारेका मागमा तोकिएको दरबन्दी अनुसारको क्षमताभन्दा बढी बेडमा चलिरहेका सरकारी अस्पतालहरूको दरबन्दी तत्काल हालको बेड संख्याअनुसार बढाइनुपर्ने, गुणस्तरीय स्वास्थ्य सेवा दिनुपर्ने, आधारभूत स्वास्थ्य सेवा निःशुल्क गरिनुपर्ने, स्थानीय निकायको बजेटको आधा हिस्सा स्वास्थ्य क्षेत्रमा लगानी गरिनुपर्ने, अवैधानिक स्वास्थ्य संस्थाहरूमाथि नियन्त्रण गरिनुपर्नेलगायत छन् ।

क्याटेगोरी : समाचार
ट्याग : #डा. गोविन्द केसी