प्रहरीको नक्कली परिचयपत्र देखाइ लुटपाट गरेको आरोपमा दुई जना पक्राउ

प्रनिश थापा चितवन संवाददाता २०७९ भदौ २० गते ०७:४६ मा प्रकाशित

चितवनमा नक्कली प्रहरी सहित दुई जनालाई प्रहरीले पक्राउ गरेको छ । प्रहरी सहायक निरीक्षकको नक्कली परिचय पत्र देखाएर आइसक्रिम तथा कुल्फी विक्री गर्ने भारतीय नागरिक विरेन्द्र साहलाई लुटपाट गरेको आरोपमा प्रहरीले दुई जनालाई पक्राउ गरेको हो ।

पक्राउ पर्नेहरूमा विशाल पौडेल र विजय महत रहेका छन् । कालिका नगरपालिका ८ जुटपानी–शक्तिखोर सडकखण्डको गैरिवारीचोकबाट ना ३५ प ६५२० नम्वरको स्कुटरसहित उनीहरुलाइ प्रहरीले पक्राउ गरेको हो ।

पक्राउ परेका आरोपितहरुले कालिका नगरपालिका ८ गैरीवारीमा आईसक्रिम तथा कुल्फी बेच्दै हिँडेका भारतीय नागरिक ४७ वर्षीय विरेन्द्र साहलाई ‘हामी प्रहरी हौं’ भनी प्रहरीको नक्कली कार्ड देखाई धाकधम्की दिई पाँच हजार ४०० रुपैयाँ लुटपाट गरी भागेका थिए ।

भदौ १८ गते बिहान करिब साँढे ११ बजे भएको उक्त घट्नामा प्रहरी चौकी जुटपानीबाट खटिएको प्रहरीको टोलीले आरोपितहरूलाई दुई घण्टाभित्रै पक्राउ गर्न सफल भएको बताइएको छ । पक्राउ परेका उनीहरूलाई चोरी तथा डाँका सम्बन्धि कसूरमा सम्मानित चितवन जिल्ला अदालतबाट पाँच दिनको म्याद अनुमती लिइ अनुसन्धान गर्ने कार्य भइरहेको ईलाका प्रहरी कार्यालय टाँडीले जनाएको छ ।

क्याटेगोरी : अपराध/सुरक्षा, विशेष, देश परदेश, समाचार, स्थानीय