काठमाडौं । नेकपा एकीकृत समाजवादीका अध्यक्ष माधवकुमार नेपालले नेपाली राजनीतिमा आफूहरु अरुभन्दा भिन्न भएको भन्दै आफ्नो पार्टी गरिब र शोषितको पक्षमा संघर्ष गर्ने पार्टी भएको बताए ।
पार्टी निकट अनेरास्ववियूको केन्द्रीय कमिटीको पहिलो विस्तारित बैठकमा बोल्दै उनले कुनै पनि कम्युनिष्ट पार्टीले गरिब र सर्वहारा वर्गको पक्षमा कुनैपनि प्रकारको कदम नचालेको बताए ।

‘समाजमा विभिन्न वर्ग छन् । हामी समाजका शोषित जनताको पक्षमा, अन्याय, अत्याचार र थिचोमिचोमा परेका जनताको पक्षमा लड्न सर्वहारा वर्गीय दृष्टिकोण लिएर आएका हौं । हामी अरु जस्तै होइनौं । हामी अरुभन्दा भिन्न हौं । हामी क्रान्तिकारी हौं । परिवर्तनकामी हौ । जनताको हितको रक्षा गर्ने योद्धाहरु हौं । देशको रक्षा गर्ने र जनताको हितप्रति समर्पित हुने योद्धाको रुपमा हाम्रो भूमिका नेपाली समाजले स्वीकारेको छ ।’

नेपालले अखिलका विद्यार्थीहरुलाई स्वार्थी र व्यक्तिवादी नबन्न सुझाव दिदैँ अब सम्पूर्ण ध्यान आगामि निर्वाचनमा पार्टीलाई जिताउनको लागि केन्द्रित हुनुपर्ने बताए ।

‘तपाईंहरु भ्रष्टाचारमा लिप्त नहुनुस् । इमानदारिता, निष्ठा र समर्पणको बाटो अंगाल्नुस् । आफ्नो कामबाट सबै विद्यार्थीको मन जित्नुस् । हामी इमान्दार भए मात्र जनताको विश्वास जित्न सक्छौ । हामी अरु संगठन भन्दा अगाडी जाने विषयमा ध्यान दिनुपर्छ ।’
उनले आफ्नो पार्टीले एमालेसँग विद्रोह नगरेको भए नेपालको राजनीति अहिले एउटा ठूलो सुरुङभित्र र प्रतिगामि अवस्थामा हुने बताए ।

 

क्याटेगोरी : समाचार
ट्याग : #माधवकुमार नेपाल

---

---

---