पेरिसडाँडामा पीडित किसानहरुको धर्ना

साझापाना २०७९ साउन ३१ गते १३:०८ मा प्रकाशित

काठमाडौं । नेकपा माओवादी केन्द्रको पार्टी कार्यालय पेरिसडाँडामा आज नक्कली जग्गाधनी खडा गर्ने र भ्रष्ट कर्मचारीलाई कारबाहीको माग गर्दै नलवपरासीका पीडित किसानहरुले धर्ना दिएका छन् ।

एकातर्फ स्थायी कमिटिको बैठक बसिरहेको बेला अर्कोतर्फ आफूले वर्षौदेखि भोगचलन गर्दै आएको जग्गा नक्कली जग्गाधनी बनेर अर्कैको नाममा नामसारी गरेर भूमाफियाले जग्गा हडपेको भन्दै नवलपरासी पश्चिमको पाल्हीनन्दन गाउँपालिका–६ का पीडित संघर्ष समितिले आज बिहान माओवादीको पार्टी कार्यालय अगाडि धर्ना दिएका हुन् ।
उनिहरुले ३ दिनदेखी धर्ना दिरहेका छन् । तर आफ्नो कुराहरु राख्न र बोल्न नदिएको पीडित किसानहरु बताउछन् ।

हामी एकदम अन्योलमा छौं । ३ दिन देखी हामी धर्ना बसिरहेका छौं । आज पेशी हो तर माथि जाउ प्राइभेट वकिल राख भन्छन् । मलाई कहि बोल्न दिँदैनन् ।

बैठकस्थलमा धर्ना दिन पुगेका उनीहरुको नाममा भएको जग्गा भारतबाट आएर अर्के व्यक्तिले नक्कली जग्गाधनी बनेर उनीहरुको जग्गा हडपेपछि उनीहरु घरबारबिहीन भएका हुन् ।