काठमाडौं । काठमाडौंको काभ्रेस्थलीमा एकै परिवारका सबै चारजना मृत भेटिएको घटना हत्यापछि आत्महत्या भएको प्रहरीले निष्कर्ष निकालेको छ ।

तारकेश्वर नगरपालिका-२ पदमसालस्थित एकतले घरमा सोमबार बिहान ४१ वर्षीय दिनेश पाण्डे, उनकी ३९ वर्षीया श्रीमती सुनिता, १३ वर्षीया छोरी आशिका र ८ वर्षीय छोरा आशिक विभत्स अवस्थामा मृत भेटिएका थिए ।

चार वर्षअघि जग्गा किनेर बनाएको उक्त घरमा पाण्डे परिवार बस्दै आएका थिए । प्रहरीका अनुसार बन्द कोठाभित्र उनिहरूको शव भेटिएको थियो । छोरा र छोरीको शव ओछ्यानमा थियो भने बाबुआमाको भुइँमा लडेको अवस्थामा ।

प्रहरीका अनुसार दिनेशले तीनजनाको हत्यापछि नाडी काट्नुका साथै झुन्डिनेसमेत प्रयास गरेको देखिएको छ । उनको पेटमा छुराको चोट पनि छ । काठमाडौं उपत्यका अनुसन्धान कार्यालयका प्रवक्ता कृष्ण कोइरालाले श्रीमती र छोराछोरीको टाउको र पेटका विभिन्न भागमा धेरैपटक छुरा प्रहार भएको बताए ।

‘दिनेशले श्रीमती र छोराछोरीको हत्या गरेर आफूले आत्महत्या गरेको हाम्रो प्रारम्भिक निष्कर्ष छ । बाँकी अनुसन्धानबाट खुल्दै जाला’, एसपी कोइरालाले नेपाल प्रेससँग भने ।

१२ वर्ष कुवेतमा वैदेशिक रोजगारी गरेर फर्किएका दिनेशले मनोहरामा खरिद गरेको जग्गा बिक्री गरेर पदमसालमा जग्गा किन्नुका साथै त्यसमा घर पनि बनाएका थिए । गोरखा स्थायी घर भएका पाण्डे परिवारको त्यसपछि पदमसाल नयाँ घर ठेगाना बनेको थियो ।

उनले पदमसालमै मोबाइल मर्मतको पसल सञ्चालन गर्दै आएकामा एक महिनाअघि मात्र बिक्री गरेका थिए । यता श्रीमती ८ महिनादेखि फेन्सी पसल चलाउँदै आएकी थिइन् । उनी एक महिनापछि सिजनल भिसामा यूके जाने तयारीमा थिए । प्रहरीको प्रारम्भिक अनुसन्धानमा दिनेश पछिल्लो समय निकै बेचैन देखिएको पाइएको छ ।

‘श्रीमतीलाई उनि निकै शंका गर्ने स्वभावका रहेछन् । श्रीमती जता गएपनि चियो चर्चो गर्ने, पछ्याउने उनको स्वभाव रहेछ’, अनुसन्धानमा खटिएका एक प्रहरी अधिकृत भन्छन्, ‘श्रीमती यूके जाने भएपछि दिनेशमा शंका अझै बढेको हुन सक्छ ।’

श्रीमतीसँगको विवादकै कारण तीनपटकसम्म प्रहरी कार्यालयमा पुगेर मिलापत्र भएको तथ्यांक भेटिएकाले यसलाई श्रीमान्-श्रीमतीबीचको विवाद र आशंकाबाट सृजित घटनाका रुपमा बुझ्न सकिने ती अनुसन्धान अधिकृत भन्छन् । श्रीमतीले अरु केटाहरूसँग बोल्दा दिनेशले विवाद गर्ने र शंका गर्ने गरेको प्रहरीले प्रारम्भिक अनुसन्धानमा जानकारी पाएको छ । प्रहरीको दाबीलाई पुष्टि गर्ने थप दुईवटा प्रमाण हुन् घटनास्थलमा भेटिएको सुसाइड नोट र श्रीमतीले केटाहरूसँग म्यासेन्जरमा गरेका कुराकानीको स्क्रिनसटका प्रिन्ट कपी ।

८ वटा पेजको सुसाइड नोट दिनेश आफैँले लेखेको दाबी गर्दै अनुसन्धान अधिकृत भन्छन्, ‘स्टिच गरिएको ती पेजमा दिनेशले विवाह अघिदेखिका कुराहरू उनले लेखेका छन् । वैवाहिक जिवनबाट आफू सन्तुष्ट नरहेको उनले पटकपटक दोहोर्‍याएका छन् ।’

श्रीमतीले अन्य केटाहरूसँग म्यासेन्जरमा गरेका कुराकानीको स्क्रिनसटको प्रिन्ट गरेर सुसाइड नोटसँगै राख्न्नुले दिनेशले सुनितामाथि शंका गर्ने गरेको र उनीहरूबीचको सम्बन्ध बिग्रिएको पाइएको ती अधिकृतले बताए ।

‘स्क्रिनसटलाई प्रिन्ट गरेर सुसाइड नोटमा राख्नुले पनि यो घटनाबारे बुझ्न धेरै पर गइरहन पर्दैन’, प्रहरीको भनाइ छ ।

क्याटेगोरी : समाचार
ट्याग : #breaking, #काभ्रेस्थली घटना

---

---

---