साउन महिनाको दोस्रो सोमबार पशुपतिमा रमझम

साझापाना २०७९ साउन ९ गते ११:१८ मा प्रकाशित

काठमाडौं । साउन महिना शिवजीको पूजा अराधाना गर्ने महिनाको रुपमा लिने गरिन्छ । यो महिनामा पनि सोमबार विशेष मानिन्छ । अघिपछि पनि सोमबार शिवजीको व्रत बस्ने गरिन्छ भने साउनमा व्रत बस्नुलाई त झनै महत्वपूर्ण मान्ने गरिएको छ ।

आज साउन महिनाको दोस्रो सोमबार । विशेषगरी महिला तथा युवतीहरुले आफ्ना श्रीमानको दीर्घायुका लागि कामना गरेर व्रत बस्छन् भने अविवाहितहरुले असल श्रीमान पाउनका लागि कामना गर्ने विश्वास गरिँदै आएको छ ।

यो महिना पशुपतिनाथ मन्दिरमा हजारौँ भक्तजनहरुले दर्शन गर्छन् । यो महिना बोलबम जाने गरिन्छ । महिला तथा युवतीहरुले पहेँलो हरियो वस्त्र लगाउने, व्रत बस्ने एवम् पूजा अर्चना गर्ने गर्दछन् । पछिल्लो समय पुरुषहरु पनि बोलबम जाने व्रत बस्न थालेका छन् ।

यसै क्रममा आज सोमबार पनि पशुपतिनाथमा बिहानैदेखि भक्तजनहरुको भीडा लाग्यो । शिवजीको स्तुति गाउँदै भक्तजनहरुले पशुपति दर्शन गरे । त्यसपछि मन्दिर परिसरमा भजनमा नाचगान गर्दै उनीहरुले साउने सोमबार मनाएका छन् ।