काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले अर्थमन्त्री जनार्दन शर्माको राजीनामाले पार्टीले त्याग, वैधानिक र राजनीतिक पहलकदमीबाट विपक्षीलाई जवाफ दिएको बताउनुभएको छ ।

केन्द्रिय समितिको बैठकमा सदस्यहरूको जिज्ञासा र प्रस्तावमाथिको प्रष्टीकरणमा अध्यक्ष प्रचण्डले अर्थमन्त्रीले राजीनामा दिनैपर्ने बाध्यता नभएपनि पार्टीले नैतिकता देखाएको बताउनुभयो ।

उहाँले पार्टीले नैतिकताको राजनीति गर्छ भन्ने सन्देश दिएको बताउँदै छानबिन प्रक्रियालाई सहज बनाउन रोष्टमबाट आफ्ना कुरा दृढतापूर्वक राखेर अर्थमन्त्रीले राजीनामा दिनुभएको उल्लेख गर्नुभयो ।

अध्यक्ष प्रचण्डले सरकार र गठबन्धनलाई नै अप्ठ्यारो पार्ने षड्यन्त्र भएको बताउँदै अर्थमन्त्री जनार्दन शर्माले कुनै गल्ती नगरेको समेत प्रष्ट पार्नुभयो ।

बैठकमा अध्यक्ष प्रचण्डले नेकपा माओवादी केन्द्रले छिट्टै विशेष महाधिवेशन गर्ने जानकारी समेत दिनुभयो ।

महाधिवेशनको मिति छिट्टै तोकिने भन्दै अध्यक्ष प्रचण्डले महाधिवेशनबाट समाजवादी क्रान्तिको योजनालाई नयाँ उचाइमा पुर्‍याउन नयाँ अभियान चलाउने गरी अघि बढ्ने दाबी समेत गर्नुभयो ।

नेकपा माओवादी केन्द्रको केन्द्रिय समिति बैठक जारी छ ।

क्याटेगोरी : समाचार
ट्याग : #नेकपा ( माओवादी केन्द्र, #पुष्पकमल दाहाल प्रचण्ड, #प्रचण्ड

---

---

---