काठमाडौँ । कृषि, सहकारी तथा प्राकृतिक स्रोत समितिले नेपालमा उर्जाको सम्भावना, वर्तमान अवस्था र चुनौतिका विषयमा उर्जाविज्ञसँग छलफल गरेको छ ।

समितिकोे सिंहदरबारमा आज गरेको छलफलमा उर्जा विज्ञहरुले उर्जा विकासमा मुख्यतः राज्यले जलविद्युत उत्पादनलाई प्राथमिकतामा राख्नुपर्ने सुझाव दिनुभएको छ ।

छलफलमा उर्जाविज्ञ रामहरि ढकालले एक कार्यपत्र प्रस्तुत गर्दै नेपालको उर्जा विकासमा क्षेत्रीय सन्तुलन कायम गर्दै सम्भाव्य क्षेत्रमा जलविद्युत उत्पादन र त्यसको पूर्वाधार विकासलाई राज्यले प्राथमिकतामा राख्नुपर्ने बताउनुभयो ।

सांसदहरुले जलासययुक्त जलविद्युत उत्पादनमा जोड दिँदै काम गर्नेहरुलाई सहज वातावरण बनाउन सरकारले अग्रसरता देखाउनुपर्ने बताउनुभयो ।

उहाँहरुले सरकारले भटाभट खोला किनबेच गर्न दिएर उत्पादनलाई ध्यान दिन नसकेको भन्दै अरुले पाउने सुहलीयत नेपाली उत्पादकहरुलाई पनि दिनुपर्ने धारणा राख्नुभयो ।

छलफलमा सांसद राधाकुमारी ज्ञवाली र छविलाल बिश्वकर्माले नीजि उर्जा उत्पादकहरुको संस्था इपानले बर्षौदेखि अरुले पाएको सुविधा पाउनुपर्ने माग गरिरहँदा सुनुवाई हुन नसक्नुले जलविद्युत उत्पादनमा नीजि क्षेत्र प्रोत्साहित हुन नसकिरहेको बताउनुभयो ।

यस्तै, सांसदहरु लालकाजी गुरुङ र दलबहादुर रानाले केही कम्पनीहरुलाई भटाभट खोला दर्ता र किनबेच गर्न दिएपनि उत्पादनलाई प्राथमिकतामा राखेर काम गर्न खोज्नेलाई वातावरण बनाइदिनुपर्ने बताउनुभयो ।

यसैगरी, सांसदहरु राजबहादुर बुढा क्षेत्री, भूपेन्द्रबहादुर थापा र सत्यनारायण शर्मा खनालले पानीको बहुउपयोगलाई ध्यान दिँदै उर्जा उत्पादन, सिँचाइ र कृषियोग्य जमिनको संरक्षण गर्दै उर्जा विकास र आवश्यक पूर्वाधार निर्माणलाई प्राथमिकतामा राख्नुपर्ने बताउनुभयो ।

हाल मुलुकमा कुल दुई हजार एक सय ३ मेघावाट क्षमताको विद्युत उत्पादन आयोजनाहरु सञ्चालनमा रहेको छ । तीमध्ये ३१ प्रतिशत नेपाल विद्युत प्राधिकरणको एकल लगानीमा, २३ प्रतिशत नेपाल विद्युत प्राधिकरण समेतको लगानीमा र ४६ प्रतिशत नीजि क्षेत्रको लगानीमा विद्युत उत्पादन भइरहेको तथ्याङ्कले देखाएको छ ।

क्याटेगोरी : समाचार
ट्याग : #उर्जा

---

---

---