लैङ्गिक अल्पसंख्यकका लागि अग्नि नियन्त्रण तालिम आयोजना

साझापाना २०७९ असार ५ गते १६:२८ मा प्रकाशित

धनगढी। धनगढी उप–महानगरपालिकाले लैङ्गिक अल्पसंख्यकका लागि घरेलु आगलागी नियन्त्रण तालिम आयोजना गरेको छ ।

यूरोपेली आयोगको आर्थिक सहयोग, संयुक्त राष्ट्रसंघीय विकास कार्यक्रम र नेपाल रेडक्रस सोसाइटी कैलाली जिल्ला शाखाको प्राविधिक सहयोगमा सञ्चालित शहरी विपद् तथा भूकम्प पूर्वतयारी परियोजना (सुपर)को सहकार्यमा उक्त तालिम धनगढीमा आयोजना गरिएको हो ।

प्राइड मन्थको समयमा सूदुर पश्चिम समाजको समन्वयमा उक्त तालिम गरिएको थियो ।

बढ्दो शहरीकरणले आगलागीको जोखिम उच्च छ । धनगढी जस्ता प्रमुख शहरमा जनसंख्याको उच्च चाप, प्राविधिक सहायता विना बनाइएको पुराना घरहरूको वायरिङ्, अव्यवस्थित ग्याँसको प्रयोग र जनचेतनाको कमिमा गरिने लापरवाहिका कारण यो समस्याले विकराल रूप लिँदैछ ।

अझ लैङ्गिक अल्पसंख्यक समुदायहरू परिवारबाट टाढा रहने, एकै ठाँउमा धेरै जना बस्ने र शिक्षाको कमीले आगलागीका घटनालाई बढोत्तरी दिएको छ ।

यि सबै विविध कारणले यो समुदाय अझ बढी संकटासन्न भएको दावी सूदुर पश्चिम समाजमा एम एनड ई अफिसर निरङ्ग चौधरी गरेका छन् ।

यस्ता तालिमहरू यो समुदायलाई पहिलो पटक प्रदान गरिएको र यो तालिमले समाजका सम्पूर्ण साथीहरूलाई जिवन रक्षाका लागी उपयोगी शिप दिएको उनको भनाइ छ ।

साथै यो शिप उनीहरूले आफू निकटका साथीहरूमा पनि पुर्याउन प्रयास गर्ने भन्दै सुपर परियोजनाकोसँग नियमित सहकार्यको अपेक्षा राख्दै परियोजनालाई धन्यवाद दिएका थिए ।

धनगढी सूदुर पश्चिम प्रदेशको एक मात्र उप–महानगरपालिका हो । यस उप–महानगरपालिकामा प्रदेश भरिकै लैङ्गिक अल्पसंख्यकहरूको भारि मात्रामा बसोबास रहेको छ ।

क्याटेगोरी : समाचार
ट्याग : #धनगढी उप–महानगरपालिका