काठमाडौं। पाँच वर्ष देखि १२ वर्ष मुनिका बालबालिकालाई लगाउने २२ लाख भन्दा बढी कोभिडविरुद्धको फाइजर (पेडियाट्रिक) खोप आज काठमाडौं आइपुगेको छ ।

स्वास्थ्य सेवा विभागअन्तर्गत आपूर्ति शाखाका प्रमुख डा. सुरेन्द्र चौरासियाले पाँच देखि १२ वर्ष मुनिका बालबालिकालाई दिन मिल्ने फाइजरको २२ लाख तीन हजार मात्रा खोप आज काठमाडौं आइपुगेको जानकारी दिनुभयो ।

कोभ्याक्स सुविधाअन्तर्गत अमेरिकी सरकारको अनुदानमा सरकारले करिब ८४ लाख डोज खोप पाउने मध्ये २२ लाख खोप आज प्राप्त गरेको हो ।

उक्त खोप आगामी असार ९ देखि १५ गतेसम्म २७ जिल्लामा सुरु हुने पहिलो चरणका खोप अभियानका लागि प्रयोग हुने चौरासियाले बताउनुभयो । सरकारले कुल ३९ लाख बालबालिकालाई खोप लगाउने लक्ष्य लिएको छ ।

क्याटेगोरी : समाचार, स्वास्थ्य
ट्याग : #फाइजर खोप

---

---

---