विपद्बाट बच्न र बचाउनका दाङमा कृत्रिम उद्धार अभ्यास

साझापाना २०७९ असार ४ गते १५:०० मा प्रकाशित

दाङ । विपद्बाट बच्न र बचाउनका लागि दाङमा कृत्रिम उद्धार अभ्यास गरिएको छ ।

सशस्त्र प्रहरी बल नेपाल नं २९ गण हेड क्वाटर ज्वालामाई भालुवाङको समन्वयमा सशस्त्र प्रहरी बल नेपाल ५ नम्बर विन्ध्यवासिनी बाहिनी मुख्यालय रुपन्देही चन्द्रौटा कपिलवस्तुले दाङको राप्ती नदीमा कृत्रिम उद्धार गरिएको हो ।

राप्ती नदीमा मनसुन एवम् विपद्जन्य घटनामा आधारित कृत्रिम घटना अभ्यास गरिएको हो ।

नेपालमा मनसुन भित्रन लागेको र त्यसले विपद् निम्ताउन सक्ने भन्दै पूर्व तयारी स्वरूप कृत्रिम घटना अभ्यास गरिएको सशस्त्र प्रहरी बल नेपाल ५ नम्बर विन्ध्यवासिनी बाहिनी मुख्यालय रुपन्देहीका बाहिनी पति एवम् सशस्त्र प्रहरी नायव महानिरीक्षक कुलबहादुर नेम्वाङले जानकारी दिनुभयो ।

अभ्यासका क्रममा नदीमा कृत्रिम उद्धार अभ्यासको लागी सशस्त्र प्रहरीलाई राप्ती नदीमा बगाइएको थियो । विपद् व्यवस्थापन तालिम प्राप्त सशस्त्र उद्धार टोलीले डुङ्गामार्फत उक्त राप्ती नदीमा तैरिरहेका सशस्त्र प्रहरीको खोजीपछि जीवितै उद्धार गरेका थिए ।

उद्धार गरी बाहिर निकालिसकेपछि के कसरी व्यवस्थापन गरिन्छ भनेर कृत्रिम उद्धार अभ्यासमा देखाइएको थियो भने विपद्का बेला आइपर्ने समस्या, उद्धार, बैठक, अनुगमन, प्राथमिक उपचार, रेफर र राहतका विषयमा अभ्यास गरिएको थियो ।

कृत्रिम घटना अभ्यासमा नदीमा मान्छे बगेकाहरूको खोज तथा उद्धार, प्राथमिक उपचार, सूचना दिने काम देखाइएको थियो ।