कञ्चनपुर । प्रधानमन्त्री शेरबहादुर देउवाले जनताको कामलाई प्राथमिकता दिन स्थानीय तहका जनप्रतिनिधिहरूलाई निर्देशन दिनुभएको छ ।

कञ्चनपुरको महेन्द्रनगरमा आज नेपाली काँग्रेसले आयोजना गरेको स्थानीय तहमा निर्वाचित जनप्रतिनिधिहरूलाई बधाई तथा शुभकामना ज्ञापन कार्यक्रमलाई सम्बोधन गर्नुहुँदै काँग्रेस सभापति तथा प्रधानमन्त्री देउवाले जन भावना अनुसार काम गर्न निर्देशन दिनुभएको हो ।

उहाँले आगामी निर्वाचनहरूमा समेत नेपाली काँग्रेसलाई थप बलियो बनाउने गरी खटिन नेता कार्यकर्ताहरूलाई समेत निर्देशन दिनुभयो ।

कार्यक्रमलाई सम्बोधन गर्दै नेपाली काँग्रेसका केन्द्रीय सदस्य तथा पूर्व मन्त्री द्वय एन्.पि. साउँद र रमेश लेखकले स्थानीय तहको निर्वाचनमा देशभर नेपाली काँग्रेसले राम्रो नतिजा हासिल गरेको र यो उपलब्धिलाई बढाउँदै लैजानु पर्ने धारणा राख्नुभयो ।

उहाँहरूले पार्टी अल्पमतमा रहेको समयमा सरकारको नेतृत्व गर्नु, एमसिसी सम्झौता संसद्बाट पारित गर्नु र स्थानीय तहको निर्वाचनमा राम्रो उपलब्धि प्राप्त गर्नुले नेपाली जनताको विश्वास काँग्रेसमा रहेको प्रष्ट पारेको बताउनुभयो ।

क्याटेगोरी : समाचार
ट्याग : #breaking, #शेरबहादुर देउवा

---

---

---