नाबालिकालाई यौन दुब्यवहार गरेको आरोपमा शिक्षक पक्राउ

प्रनिश थापा चितवन संवाददाता २०७८ चैत्र २५ गते १८:४९ मा प्रकाशित

चितवन । आफैंले पढाउने छात्रालाई यौन दुब्यवहार गरेको आरोपमा चितवन प्रहरीले दुई शिक्षकलाइ पक्राउ गरेको छ ।

जिल्ला प्रहरी कार्यालय चितवनका अनुसार भरतपुर महानगरपालिका वडा नंम्बर १३ गंगानगरमा रहेको श्री माध्यमिक विद्यालयमा अध्ययनरत दुई नाबालिका छात्रालाइ यौन दुर्व्यवहार गरेको आरोपमा प्रहरीले सोही बिद्यालयका शिक्षक भरतपुर महानगरपालिका १३ बस्ने ५८ वर्षीया फणिन्द्र भट्टराई र ५२ बर्षीया शिक्षक बिमलप्रसाद देवकोटालाई पक्राउ गरेको हो ।

पक्राउ परेका शिक्षकद्वयले कक्षा ४ मा अध्ययनरत १३ वर्षीया नाबालिका र कक्षा ६ मा अध्यनरत अर्का १२ वर्षीया नाबालिकलाई यौन दुर्व्यवहार गरेका थिए ।

उनीहरुले विभिन्न बहानामा विद्यार्थीहरुको शरीरका विभिन्न स्थानहरुमा हात लगाउने, संवेदनशील अङ्गमा सुम्सुम्याउने गरेको भनी नाबालिकाको तर्फबाट दुवैका अभिभावकले बिहीबार जिल्ला प्रहरी कार्यालय चितवनमा बाल यौन दुरुपयोग मुद्दामा जाहेरी दरखास्त गरेका थिए ।

नाबालिकाहरुको तर्फबाट अभिभावकले जाहेरी दिएलगत्तै दुवै शिक्षकलाई प्रहरीले पक्राउ गरेको थियो । पक्राउ परेकाहरूउपर आज शुक्रबार सम्मानित चितवन जिल्ला अदालतबाट म्याद अनुमति लिई थप अनुसन्धान गर्ने कार्य भइरहेको प्रहरीले जनाएको छ ।

पछिल्लो समय चितवन प्रहरीले बिद्यालयभित्र बालबालिकामाथि हुने गरेका यौन दुब्यवहार जस्ता घट्नामा संलग्न शिक्षक माथि पक्राउ गरी अनुसन्धान गर्दै आइरहेको छ । केही दिनअघि मात्रै प्रहरीले माडी नगरपालिकाका एक शिक्षकलाई समेत विद्यार्थीलाई यौन दुब्यवहार गरेको आरोपमा पक्राउ गरेको थियो ।

क्याटेगोरी : अपराध/सुरक्षा, ब्रेकिंग न्युज, विशेष, देश परदेश, समाचार, स्थानीय