गण्डकी प्रदेश सभा : विपक्षी गठबन्धनलाई साथ दिने मनाङेको संकेत

साझापाना २०७८ जेठ २७ गते ०८:४४ मा प्रकाशित

पोखरा, २७ जेठ । गण्डकी प्रदेश सभा विघटनको प्रस्ताव आएपछि युवा तथा खेलकुदमन्त्री राजिव गुरुङ उर्फ दीपक मनाङेले नेपाली कांग्रेससहितको विपक्षी दलहरूको गठबन्धनलाई साथ दिने संकेत गरेका छन् ।

बुधबार साँझ बसेको गण्डकी प्रदेशको मन्त्रिपरिषदको बैठकमा मनाङे अनुपस्थित भएका छन् । मनाङेलाई गण्डकी प्रदेश सभा विघटनका लागि मनाउन एमालेका गण्डकी प्रदेशका सांसद राजिव पहरीसहित मनाङ जिल्लाका दुई सांसद फकाउन निवासमै पुगेका थिए ।

मनाङेले गण्डकी प्रदेश सभा विघटनको प्रस्तावलाई सिधै अस्वीकार गरिदिएका छन् । मनाङेको निर्णयले एमालेका नेताहरू र मुख्यमन्त्री पृथ्वीसुब्बा गुरुङलाई तनाब भएको छ ।

मनाङेले पोखराका स्थानीय पत्रकारहरूलाई आफूले गण्डकी प्रदेश बचाउन कुनै पनि निर्णय र कदम उडाउन तयार रहेको बताएका छन् । उनले आफूलाई गण्डकी प्रदेश विघटनका लागि फकाउन मनाङका दुई सांसद र एमालेका राजिव पहरी घरमै आएको बताएका छन् ।

प्रदेश सभा रह्यो भने सबै मन्त्री बन्न सकिने भन्दै मनाङेले प्रदेश सभा विघटनमा आफूले साथ नदिने बताएका छन् ।

मुख्यमन्त्री गुरुङले बिहीबार विश्वासको मत लिने तयारी गरेको एक दिन अगाडि मनाङेले आफूलाई नयाँ मोडमा लगेका छन् । मनाङेले सत्ता पक्षलाई साथ नदिने तयारी गरेका छन् । मनाङेले साथ छाड्ने हो भने संख्या नपुगेर मुख्यमन्त्री गुरुङको प्रदेश सरकार ढल्नेछ ।

मनाङेले मुख्यमन्त्री गुरुङलाई साथ दिएनन् भने नेपाली कांग्रेसलाई गण्डकी प्रदेशमा सरकार बनाउन बाटो खुल्ने सम्भावना बढेर गएको छ । कांग्रेसले मुख्यमन्त्रीमा कृष्णचन्द्र नेपाली पोखरेललाई प्रस्ताव गरेको छ ।

क्याटेगोरी : समाचार
ट्याग : #गण्डकी प्रदेश सभा