संखुवासभामा तेस्रो पटक निषेधाज्ञा थप

निषेधाज्ञा जेष्ठ २५ गते सम्म लम्बियो

सुजन बज्राचार्य २०७८ जेठ ११ गते १८:३९ मा प्रकाशित

खाँदबारी, जेठ ११ – जिल्ला प्रशासन कार्यालय संखुवासभाले निषेधाज्ञाको समयावधि तेस्रो पटक थप गरेको छ । प्रमुख जिल्ला अधिकारी टेकनारायण पौडेलले जिल्ला भर लागु हुने गरि जेठ २५ गते राति १२ बजे सम्मका लागि निषेधाज्ञा अवधि थप गर्नुभएको हो । जिल्ला कोरोना संक्रमण व्यवस्थापन समितिको बैठकले जेठ २५ गते राति १२ बजेसम्म निषेधाज्ञा लम्ब्याउने निर्णय गरेको थियो ।

स्थानीय प्रशासन ऐन २०२८ को दफा ६ को उपदफा ३, संक्रामक रोग ऐन २०२० को दफा २ र कोभिड–१९ संकट व्यवस्थापन अध्यादेश २०७८ बमोजिम २०७८ बैशाख २६ गते राति १२ बजे देखि लागु भएको निषेधाज्ञालाई जेठ २५ गते मंगलबार राति १२ बजे सम्म लागु हुने गरि निरन्तरता दिने निर्णय भएको संखुवासभाका सहायक प्रमुख जिल्ला अधिकारी मोहनमणि घिमिरेले बताउनुभयो । घिमिरेले सदरमुकाम खाँदबारी लगायत जिल्लाका मुख्य बजार क्षेत्रहरुको निषेधाज्ञामा एकरुपता कायम गर्ने समेत निर्णय भएको बताउनुभयो ।

सार्वजनिक निर्माण काममा प्रयोग हुने सवारी साधनलाई स्वास्थ्य सुरक्षा मापदण्ड अपनाएर मात्रै निर्माण सामग्री ढुवानी गर्न पाउने व्यवस्था गरिएको छ । दैनिक उपभोग्य बस्तुको किनमेलको समय बिहान ७ बजे देखि ९ बजेसम्म मात्र खोल्न दिइने साहायक प्रजिअ घिमिरेले जानकारी दिनुभयो ।

पछिल्लो समय सदरमुकाम लगायत जिल्लामा संक्रमितको संख्या दिनानुदिन बढ्दै गएको छ । हाल सम्म जिल्लामा चैत्र १९ फछि हालसम्म संक्रमितको संख्या ५ सय ८८ जना रहेको छ । त्यस मध्ये ३ सय ५१ जना सत्रिय संक्रमित रहेको र २ जनाले कोरोना भाईरसका कारण ज्यान गुमाएको जिल्ला स्वास्थ कार्यालय संखुवासभाले जनाएको छ ।

संखुवासभामा पहिलोपटक वैशाख २६ गते राति १२ बजेदेखि लागू हुनेगरी ७ दिने निषेधाज्ञा जारी गरिएको थियो । त्यसपछि निरन्तर निषेधाज्ञाको समयावधि थप हुँदै आएको छ ।