चितवनमा करेन्ट लागेर दुई जनाको मृत्यु

प्रनिश थापा चितवन २०७७ भदौ १५ गते १०:१४ मा प्रकाशित

माछा चोर्न गएका दुई जनाको करेन्ट लागेर मृत्यु भएको छ । जिल्ला प्रहरी कार्यालय चितवनका अनुसार भरतपुर महानगरपालिका ८ सल्यानी टोलमा स्थानीय चुडामडी शर्मा सहित अन्य चार जना ब्यक्तिले संचालन गरेको माछापोखरीमा पुगेर माछा चोर्न खोज्दा करेन्ट लागेर दुई जनाको मृत्यु भएको हो ।

मृत्यु हुनेहरुमा भरतपुर महानगरपालिका ८ बस्ने अन्दाजी ३५ बर्षिया नवराज दराई र निर बहादुर रानामगर रहेका छन् । उनीहरुको साथबाट प्रहरीले माछा मार्न प्रयोग हुने जाली समेत फेला पारेको छ ।

प्रहरीको प्रारम्भिक अनुसन्धानका क्रम्मा दैनिक माछा चोरी हुने क्रम बढेपछि सञ्चालकले विद्युतीय तार लगाएर रातको समयमा करेन्ट छाड्ने गरेको भेटिएको छ । शवको मुचुल्का उठाउने काम भइरहेको र परीक्षणका लागि भरतपुर अस्पताल ल्याइएको छ । मृतकको पोष्टमार्टम पछि थप कुरा पत्ता लाग्ने र यस बिषयमा प्रहरीले थप अनुसन्धान गरिरहेको चितवन प्रहरीले जनाएको छ ।

क्याटेगोरी : समाचार