देशभर १ हजार १११ जनामा कोरोना पुष्टि, संक्रमित हुनेकाे संख्या ३५ हजार पाँच सय २९ पुग्यो

एकैदिन उपत्यकामा ३७७ जना कोरोनाबाट संक्रमित

साझापाना २०७७ भदौ ११ गते १७:२० मा प्रकाशित

पछिल्लो २४ घण्टामा देशभर थप एक हजार एक सय ११ जनामा कोरोना संक्रमण पुष्टि भएको छ । संक्रमित हुनेमा तीन सय ३४ महिला र सात सय ७७ जना पुरुष छन् । याे समेत गरेर देशभर हालसम्म संक्रमित हुनेकाे संख्या ३५ हजार पाँच सय २९ पुगेकाे छ । यो अवधिमा १२ हजार ६ सय २९ जनाको नमुना पिसिआर विधिबाट परीक्षण गरिएको स्वास्थ्य तथा जनसंख्या मन्त्रालयले जनाएको छ ।

त्यसैगरी बिहीबार पाँच सय ६९ जना संक्रमण जितेर डिस्चार्ज भएका छन् । हालसम्म संक्रमणमुक्त हुनेको संख्या २० हजार ७३ पुगेको छ । संक्रमण निको हुने दर ५६ प्रतिशत रहेको मन्त्रालयका प्रवक्ता डा जागेश्वर गौतमले बताए । सक्रिय संक्रमितको संख्या भने १५ हजार दुई सय ७३ छ । त्यसमध्ये ६ हजार दुई सय १० जना होम आइसोलेसन र नौ हजार ६३ जना संस्थागत आइसोलेसनमा रहेको मन्त्रालयले जनाएको छ ।

काठमाडौं उपत्यकामा एकै दिन ३७७ जना कोरोना भाइरस संक्रमित भएका छन् । पछिल्लो २४ घन्टामा काठमाडौं २७०, ललितपुर ६६ र भक्तपुरमा ४१ जना संक्रमित भएका स्वास्थ्य तथा जनसंख्या मन्त्रालयले बिहीबार जानकारी दिएको हो । २४ घन्टाको अद्यावधिक विवरण अनुसार बुधबार उपत्यकामा ३०१ जनामा कोरोना संक्रमण भएको थियो ।