बुढानीलकण्ठ नगरपालिकाले आर्थिक वर्ष २०८२/०८३ को अर्धवार्षिक प्रगति समीक्षा कार्यक्रम सम्पन्न गरेको छ। नगरपालिकाको सभाहलमा आयोजित उक्त कार्यक्रममा विभिन्न महाशाखा, शाखा तथा वडा कार्यालयका प्रमुख तथा प्रतिनिधिहरूको उल्लेखनीय सहभागिता रहेको थियो।

समीक्षा कार्यक्रममा जनस्वास्थ्य, शिक्षा, जनसंख्या तथा सामाजिक समावेशीकरण, आर्थिक विकास, विपद् व्यवस्थापन, आर्थिक प्रशासन, प्रशासन तथा सूचना प्रविधि, योजना तथा पूर्वाधार विकास लगायतका क्षेत्रका जिम्मेवार पदाधिकारीहरूले आ–आफ्नो क्षेत्रगत प्रगति विवरण प्रस्तुत गरेका थिए। प्रस्तुतिहरूमा स्वास्थ्य सेवा विस्तार, शिक्षा तथा युवा लक्षित कार्यक्रम, सामाजिक सुरक्षा वितरण, कृषि तथा उद्योग प्रवर्द्धन, वातावरण संरक्षण, राजश्व संकलन तथा व्यवस्थापन, सुशासन प्रवर्द्धन र सार्वजनिक सम्पत्ति संरक्षणका विषयमा विस्तृत समीक्षा गरिएको थियो।

कार्यक्रममा बुढानीलकण्ठ नगर अस्पतालको सेवा विस्तार, वडा कार्यालयहरूको कार्यसम्पादन अवस्था तथा विभिन्न विषयगत कार्यक्रमहरूको प्रभावकारिताबारे अन्तरक्रियात्मक छलफलसमेत भएको थियो। सहभागीहरूले आगामी कार्यदिशा र सुधारका पक्षहरूबारे सुझाव प्रस्तुत गरेका थिए।

सम्बन्धित समितिका संयोजक तथा महाशाखा प्रमुखहरूले सत्रहरूको अध्यक्षता गर्दै सेवा प्रवाहलाई अझ प्रभावकारी, पारदर्शी र परिणाममुखी बनाउने प्रतिबद्धता व्यक्त गरेका थिए। नगरपालिकाले समन्वयात्मक ढंगले विकास गतिविधि अगाडि बढाउने, पूर्वाधार निर्माणलाई तीव्रता दिने र नागरिकमैत्री सेवा प्रवाहलाई उच्च प्राथमिकतामा राख्ने निष्कर्षसहित कार्यक्रम सम्पन्न भएको जनाएको छ।

क्याटेगोरी : स्थानीय
ट्याग : #प्रभावकारी सेवा प्रवाहमा जोड, #बुढानीलकण्ठ नगरपालिकामा अर्धवार्षिक प्रगति समीक्षा सम्पन्न

---

---

---