शिशिर घिमिरे स्मृति दिवसमा बहुभाषिक कविता वाचन, सम्मान तथा छात्रवृत्ति वितरण

साझापाना २०८२ वैशाख ७ गते ०८:५६ मा प्रकाशित

जीवनराज : बर्दिवास (महोत्तरी), वैशाख ७ ।

शिशिर घिमिरे स्मृति प्रतिष्ठानले ३० औँ राष्ट्रिय छन्द दिवसको अवसरमा बर्दिवासस्थित विनायक ब्याङ्क्वेटमा बहुभाषिक कविता वाचन, स्रष्टा सम्मान र छात्रवृत्ति वितरण कार्यक्रम सम्पन्न गरेको छ ।

प्रेम घिमिरे ‘अग्नि कवच’को अध्यक्षता र प्रदेशसभा सदस्य शारदा थापाको प्रमुख आतिथ्यमा सम्पन्न कार्यक्रममा प्रा.डा. सुमन कर्माचार्यलाई ‘शिशिर घिमिरे स्मृति प्रतिभा सम्मान २०८१’ प्रदान गरियो । उनलाई नगद १५,५५५ रुपैयाँसहित सम्मान गरिएको हो ।

कार्यक्रममा भारतबाट आएका महमद कामरुदिन नदाफले दुई विशेष शारीरिक क्षमता भएका विद्यार्थीहरूलाई जनही ५५५५ रुपैयाँका दरले छात्रवृत्ति प्रदान गरे । यस्तै शिक्षाप्रेमी मिना देवकोटाले अर्की छात्रालाई २५५५ रुपैयाँ छात्रवृत्ति उपलब्ध गराइन् ।

कविता वाचनमा डा. सुमन कर्माचार्य, कुमार कुसुम, गोपाल यादव, डा. जो जोनसन, डा. जेनी हेरिङटनलगायतका सर्जकहरू सहभागी थिए । उनीहरूलाई दिवंगत शिशिर घिमिरेकी आमा देवी घिमिरेबाट प्रशंसा पत्र प्रदान गरियो ।

कार्यक्रममा साहित्य, समाजसेवा र पर्यटन क्षेत्रका प्रतिनिधिहरूको उल्लेख्य उपस्थिति थियो । समापनतर्फ कार्यक्रमका अतिथिहरूको प्रतिक्रिया ओमकार टेलिभिजनको ‘पञ्चामृत’ कार्यक्रममा लिइएको छ, जसको प्रसारण आगामी शुक्रबार साँझ ५ बजे हुनेछ ।

क्याटेगोरी : मनोरञ्जन/साहित्य