नयाँ होली गीत लिएर आउँदै रुद्रसेनको विश्वकर्मा

साझापाना २०८१ फागुन २१ गते १८:२६ मा प्रकाशित

जीवनराज दाहाल, बर्दिवास ।

नेपाली, मैथिली र भोजपुरी संगीतमा सक्रिय गायक रुद्रसेन विश्वकर्माले नयाँ होली गीत ‘होली सररर’ यही फागुन २२ गते सार्वजनिक गर्ने तयारी गरेका छन् । रुद्रसेन क्रिएशनको प्रस्तुति रहेको उक्त गीत डिजिटल प्लेटफर्महरूमा रिलिज हुने भएको छ ।

गायक रुद्रसेन विश्वकर्मा र गायिका समीक्षा अधिकारीको आवाज रहेको यस गीतमा संगीत तथा शब्द पनि रुद्रसेनकै रहेको छ । गीतलाई योगेश काजीले एरेञ्ज गरेका छन् भने निर्माता नीर कुमारी विश्वकर्मा (सविना) हुन् ।

गीतको भिडियोमा चर्चित कलाकारहरू आर्यन सिग्देल, बिना राउत र रुद्रसेन विश्वकर्मा लगायतको आकर्षक अभिनय रहेको छ । भिडियोको छायांकन ओम प्रसाईले गरेका छन् भने सम्पादन तथा रङ संयोजन अमृत चापागाईंले गरेका छन् । गीतमा नृत्य निर्देशनको पाटो भने प्रदीप कुमार रसाइलीले सम्हालेका छन् ।

गीतको रेकर्डिङ तथा मिक्स-मास्टरीङ मनोज परियारले गरेका हुनभने गीतको रेकर्ड आफ्नो मन स्टुडियोमा गरिएको हो ।

होली पर्वलाई लक्षित गर्दै तयार पारिएको यो गीतले नेपाली दर्शक तथा श्रोतामाझ विशेष प्रभाव पार्ने अपेक्षा गरिएको छ । गीत चाँडै नै युट्युब, स्पोटिफाइ, एप्पल म्युजिक लगायतका डिजिटल प्लेटफर्महरूमा उपलब्ध हुने छ ।