काठमाडौं । नेपाली कांग्रेसको १५औँ महाधिवेशनअन्तर्गत काठमाडौं क्षेत्र नम्बर ६ बाट केन्द्रीय महाधिवेशन प्रतिनिधिमा क्षेत्रीय सभापति श्यामकृष्ण खड्कीले सर्वाधिक मत प्राप्त गर्नुभएको छ।

खड्कीले २९९ मत प्राप्त गर्दै क्षेत्र नम्बर ६ बाट सबैभन्दा बढी मत ल्याउनुभएको हो। उहाँको सर्वाधिक मतसँगै क्षेत्रीय अधिवेशनको परिणामलाई कांग्रेस वृत्तमा चासोका साथ हेरिएको छ।

यद्यपि, निर्वाचन प्रक्रियाका क्रममा भने विवादसमेत उत्पन्न भएको थियो। मतगणनाका क्रममा निर्वाचन समितिले १ मत फरक पारेको विषयलाई लिएर केही नेता तथा कार्यकर्ताबीच विवाद भएको कांग्रेस स्रोतले जनाएको छ।

स्रोतका अनुसार विवाद बढ्दै जाँदा मध्यरातमा केही नेता तथा कार्यकर्ताबीच टेबल हानाहानसमेत भएको थियो। निर्वाचन प्रक्रिया र मतगणना सम्पन्न भइसकेपछि पनि तत्काल परिणाम घोषणा हुन नसकेपछि क्षेत्र नम्बर ६ को कांग्रेस राजनीतिमा थप तरंग उत्पन्न भएको थियो।

निर्वाचन प्रक्रिया, मतगणना तथा परिणाम घोषणाका विषयमा देखिएको विवादबारे निर्वाचन समितिबाट भने औपचारिक धारणा सार्वजनिक हुन बाँकी छ।

सर्वाधिक मतसहित श्यामकृष्ण खड्की केन्द्रीय महाधिवेशन प्रतिनिधिमा निर्वाचित हुनुलाई काठमाडौं क्षेत्र नम्बर ६ को कांग्रेस राजनीतिमा महत्वपूर्ण परिणामका रूपमा हेरिएको छ।

क्याटेगोरी : समाचार
ट्याग : #breaking, #कांग्रेसको केन्द्रीय महाधिवेशन प्रतिनिधिमा श्यामकृष्ण खड्की

---

---

---