नयाँ वर्षसँगै काठमाडौंमा वाईफाइ सिसिटिभी क्यामराबाट निगरानी सेवासहितको बुढानिलकण्ठ लगनखेल रात्रि बस सेवा सुरु

साझा पाना २०८३ वैशाख २ गते ०८:१९ मा प्रकाशित

काठमाडौंमा मंगलबारदेखि वाईफाइ सुविधासहितको रात्रिकालीन बस सेवा सुरु गरिएको छ। यो सेवा पुल्चोकबाट सञ्चालनमा आएको हो, जसले काठमाडौं महानगरपालिका, ललितपुर महानगरपालिका, चन्द्रागिरि नगरपालिका र बुढानीलकण्ठ नगरपालिकाका क्षेत्रहरूलाई आपसमा जोड्ने काम गर्नेछ।

यो सेवा सुरु गर्न सम्बन्धित नगरपालिकाका प्रमुखहरूले समन्वय र सहकार्यसम्बन्धी समझदारीपत्रमा हस्ताक्षर गरेका छन्। प्रारम्भिक चरणमा ७ वटा बस सञ्चालनमा ल्याइएको छ। प्रत्येक बसमा ४ वटा सिसिटिभी क्यामेरा जडान गरिएको छ—अगाडिको दृश्य, चालक र यात्रुहरूको गतिविधि निगरानी गर्न। यसले सुरक्षा सुनिश्चित गर्नुका साथै कुनै पनि गलत गतिविधि भएमा तुरुन्तै नियन्त्रण गर्न सहयोग पुर्‍याउनेछ। यात्रुको सुरक्षाका लागि हरेक बसमा एक जना नगर प्रहरी पनि खटाइएको छ।

कार्यवाहक प्रमुख सुनिता डंगोलले यो सेवा दीर्घकालीन रूपमा सञ्चालन गर्ने लक्ष्य रहेको र भविष्यमा बिहानको सेवा पनि थप गर्ने योजना रहेको बताइन्। उनले यो पहल आर्थिक लाभभन्दा गुणस्तरीय र प्रभावकारी सेवा प्रदान गर्ने उद्देश्यले सुरु गरिएको उल्लेख गरिन्। ललितपुरका प्रमुख चिरीबाबु महर्जनले पनि सबै स्थानीय तहबीच सहकार्य आवश्यक रहेको र सेवा दिगो बनाउन लागत साझेदारी महत्त्वपूर्ण हुने बताए।

चन्द्रागिरिका प्रमुख घनश्याम गिरीका अनुसार थानकोट नाकाबाट दैनिक ठूलो संख्यामा मानिस आवतजावत गर्ने भएकाले यो सेवाले आर्थिक तथा सामाजिक गतिविधिमा सकारात्मक प्रभाव पार्नेछ। बुढानीलकण्ठका प्रमुख मिठाराम अधिकारीले स्थानीयवासीहरू यस सेवाप्रति उत्साहित रहेको बताए।

साझा यातायातसँगको सहकार्यमा सञ्चालन गरिएको यो सेवाको लागत प्रारम्भिक रूपमा असार मसान्तसम्म साझा यातायातले व्यहोर्नेछ। त्यसपछि खर्चको विश्लेषण गरेर सम्बन्धित पालिकाहरूले लागत साझेदारी गर्ने योजना रहेको छ।

दक्षिण रुटमा बस लगनखेलदेखि बुढानीलकण्ठसम्म विभिन्न प्रमुख स्थानहरू हुँदै सञ्चालन हुनेछ भने अर्को बस विपरीत दिशाबाट चल्नेछ। पूर्व–पश्चिम रुटमा थानकोटदेखि विमानस्थलसम्म बस सेवा सञ्चालन हुनेछ। हरेक रुटमा बसहरू २० मिनेटको अन्तरालमा उपलब्ध हुने व्यवस्था मिलाइएको छ।

यो रात्रिकालीन बस सेवा सुरु भएसँगै उपत्यकाका नागरिकलाई राति पनि सुरक्षित र सहज यात्रा गर्ने विकल्प प्राप्त भएको छ।

क्याटेगोरी : समाचार
ट्याग : #breaking, #नयाँ वर्षसँगै काठमाडौंमा वाईफाइ सिसिटिभी क्यामराबाट निगरानी सेवासहितको बुढानिलकण्ठ लगनखेल रात्रि बस सेवा सुरु