खाँदबारी । संखुवासभाको चिचिला गाउँपालिकाले नयाँ वर्षको अवसर पारेर पर्यटन प्रवर्द्धन गर्न खेलकुद तथा सांस्कृतिक कार्यक्रम आयोजना गर्ने भएको छ । मंगलबार आयोजित पत्रकार सम्मेलनमार्फत गाउँपालिकाले खुल्ला अन्तरपालिका स्तरीय महिला तथा पुरुष भलिबल प्रतियोगिता र सांस्कृतिक कार्यक्रम सञ्चालन गर्ने जानकारी दिएको हो ।

गाउँपालिका अध्यक्ष पासाङ नुर्वू शेर्पाका अनुसार मत्स्यपोखरी क्षेत्रको प्रचारप्रसार र पर्यटक आकर्षण गर्ने उद्देश्यले कार्यक्रम आयोजना गरिएको हो । चिचिला खेलकुद विकास समिति, वडा नं. ४ र स्वर्णीम मत्स्यपोखरी युवा क्लबको संयुक्त आयोजनामा कार्यक्रम हुने जनाइएको छ ।

भलिबल प्रतियोगिता चैत्र २६ गतेबाट सुरु भई बैशाख १ गते समापन हुनेछ। त्यसपछि सांस्कृतिक कार्यक्रम अन्तर्गत सामूहिक नृत्य प्रतियोगिता तथा चर्चित कलाकारहरूको प्रस्तुति रहनेछ।
प्रतियोगितामा आकर्षक नगद पुरस्कारको व्यवस्था गरिएको छ। पुरुषतर्फ विजेताले १ लाख ५५ हजार र महिलातर्फ विजेताले १ लाख रुपैयाँ प्राप्त गर्नेछन् ।

साथै अन्य विजेता तथा सेमिफाइनलिस्ट टिमहरूलाई पनि नगदसहित सम्मान गरिनेछ । स्थानीय तहले पर्यटन पूर्वाधार विकाससँगै प्रचारप्रसारमा जोड दिएको र कार्यक्रम सफल बनाउन सञ्चारकर्मीको साथ रहने अपेक्षा व्यक्त गरिएको छ ।

क्याटेगोरी : समाचार
ट्याग : #खेलकुद, #चिचिला गाउँपालिका, #पर्यटन प्रवर्द्धन, #मत्स्यपोखरी प्रवर्द्धन, #संखुवासभा

---

---

---