जंगली च्याउ खाँदा संखुवासभामा १ को मृत्यु

साझा पाना २०७७ वैशाख २६ गते १४:४९ मा प्रकाशित

संखुवासभा – सभापोखरी गाउँपालिका–२ गोठगाउँमा जंगली च्याउ खाँदा शुक्रबार एकजनाको मृत्यु भएको छ । जंगलबाट टिपेर ल्याएको च्याउ खाँदा २४ वर्षीया मनिला राईको मृत्यु भएको हो । जंगली च्याउ खाएर बिरामी भएकी मनिलाको शुक्रबार राति उपचारको क्रममा विराटनगरस्थित नोबेल अस्पतालमा मृत्यु भएको सभापोखरी गाउँपालिका अध्यक्ष रत्न सुब्बाले जानकारी दिए । उनको जिल्ला अस्पताल खाँदबारीमा उपचार हुन नसकेपछि बैशाख २३ मा विराटनगर रिफर गरेको थियो ।

च्याउ खाएर बिरामी परेपछि मनिला बैशाख २१ मा जिल्ला अस्पतालमा भर्ना भएकी थिइन् । सोही दिन मनिलाका पतिले जंगलबाट च्याउ ल्याएका थिए । उक्त च्याउ खाँदा मनिला र उनकी छोरी तीन वर्षीया सुपी र छिमेकी २५ वर्षीय दिनेश राई, उनकी श्रीमती २४ वर्षीया अनिता र तीन वर्षीया छोरी आकांक्षा बिरामी भएका थिए । उनीहरुमध्ये पाँचजना उपचारपछि घर फर्किएको जिल्ला अस्पताल संखुवासभाका प्रवक्ता सुजता पौडेलले जानकारी दिइन् ।

क्याटेगोरी : समाचार