नेकपा एमाले भोजपुरले फागुन २१ मा हुने प्रतिनिधिसभा उपनिर्वाचनका लागि केन्द्रीय सचिव शेरधन राईको नाम एकल रूपमा सिफारिस गरेको छ।

मंगलबार बसेको जिल्ला कमिटी बैठकले राईको नाम सर्वसम्मत रूपमा सिफारिस गरेको एमाले भोजपुरका सचिव एक्सन राईले जानकारी दिए। उनका अनुसार पूर्वअध्यक्ष शरणकुमार राईको प्रस्ताव र युवा नेता रोशन बस्नेतको समर्थनमा शेरधन राईको नाम एकल सिफारिस गर्ने निर्णय गरिएको हो।

शेरधन राई २०५६ सालको संसदीय निर्वाचनमा २८ वर्षको उमेरमै प्रतिनिधिसभा सदस्य निर्वाचित हुँदै सबैभन्दा कान्छा सांसद बनेका थिए। उनले भोजपुरबाट तीन पटक प्रतिनिधिसभा चुनाव जितिसकेका छन्।

२०६४ सालको संविधानसभा निर्वाचनमा भने उनी साबिक भोजपुर–२ बाट माओवादीका सुदन किरातीसँग पराजित भएका थिए। २०७० सालको दोस्रो संविधानसभा निर्वाचनमा भने उनै सुदन किरातीलाई पराजित गर्दै जित हासिल गरेका थिए।

२०७४ सालको प्रदेशसभा निर्वाचनमा प्रदेशसभा ‘ख’ बाट उनले नेपाली कांग्रेसका गोविन्दबहादुर कार्कीलाई पराजित गरेका थिए। तर २०७९ को प्रतिनिधिसभा निर्वाचनमा सुदन किरातीसँग २ हजार ३८५ मतान्तरले पराजित भए। उक्त निर्वाचनमा सुदन किरातीले २८ हजार ५७५ मत प्राप्त गर्दा शेरधन राईले २६ हजार १९३ मत पाएका थिए।

कोशी प्रदेशका संस्थापक मुख्यमन्त्रीसमेत रहेका शेरधन राईले यसअघि सञ्चारमन्त्रीको जिम्मेवारी पनि सम्हालिसकेका छन्। उनी हालै सम्पन्न एमालेको ११औँ महाधिवेशनबाट लोकप्रिय मतका साथ केन्द्रीय सचिवमा निर्वाचित भएका छन्।

क्याटेगोरी : समाचार

---

---

---