आफ्नो हार अस्वाभाविक होइन, चिन्ताको विषय पनि होइन : विष्णु रिमाल

साझा पाना २०८२ पुस ४ गते १२:०४ मा प्रकाशित

नेकपा एमालेका नेता विष्णु रिमालले पार्टी महाधिवेशनमा भएको आफ्नो पराजयलाई अस्वाभाविक वा चिन्ताजनक विषय नभएको बताएका छन्। केपी शर्मा ओलीको कोर टिममा रहेका रिमाल उपमहासचिव र केन्द्रीय सदस्य दुवै पदमा पराजित भएका हुन्।

सामाजिक सञ्जालमार्फत प्रतिक्रिया दिँदै रिमालले महाधिवेशनको नतिजालाई आत्मविश्वास, संयम र प्रतिबद्धताका साथ स्वीकार गरेको उल्लेख गरेका छन्। उनका अनुसार महाधिवेशन असाधारण गरिमा, उत्साह र सामूहिक उपलब्धिको अनुभूतिको साथ सम्पन्न भएको छ।

महाधिवेशनमा स्वस्थ र कमरेड्ली प्रतिस्पर्धा देखिएको उल्लेख गर्दै रिमालले पार्टी अध्यक्ष केपी शर्मा ओलीद्वारा प्रस्तावित टिम प्रायः सर्वसम्मत रूपमा अनुमोदन भएको बताएका छन्। उनले आफू एक उपमहासचिव र एक उपाध्यक्ष बाहेक सबै पदाधिकारी निर्वाचित भएको उल्लेख गर्दै यस्तो परिणाम स्वाभाविक भएको स्पष्ट पारेका छन्।

‘यो न त अस्वाभाविक हो, न त चिन्ताको विषय। यस्ता नतिजा लोकतान्त्रिक प्रतिस्पर्धाका स्वाभाविक र स्वस्थ अभ्यास हुन्। हामी जनताको बहुदलीय लोकतन्त्रको मूल भावनाबाट दृढ रूपमा निर्देशित छौँ,’ रिमालले बताएका छन्।

क्याटेगोरी : समाचार