काठमाडौं । ग्लोबल आईएमई क्यापिटल लिमिटेडले २२ गतेदेखि बिक्रीमा ल्याएको ‘ग्लोबल आइएमई समुन्न योजना–२’ को इकाइमा आवेदन दिने म्याद थप भएको छ ।

अब लगानीकर्ताले साउन ४ गते आवेदन दिन सक्नेछन् । यसअघि कम्पनीले आज (असार २५) सम्म मात्रै आवेदन दिन पाइने भने पनि पर्याप्त आवेदन नपरेपछि म्याद थप गरिएको हो ।

ग्लोबल आइएमई बैंक लिमिटेड कोष प्रवर्द्धक तथा ग्लोबल आइएमई क्यापिटल योजना व्यवस्थापक तथा डिपोजिटरी रहेको ग्लोबल आइएमई म्युचुअल फण्डअन्तर्गतको यो योजनाको आकार १ अर्ब २० करोड रूपियाँको छ । जसअनुसार प्रतिइकाइ १० अंकित दरका १२ करोड इकाइ निष्कासन भइरहेको छ ।

जसमध्ये १८ लाख इकाइ योजना व्यवस्थापक ग्लोबल आइएमई बैंकलाई र कोष प्रवर्द्धक ग्लोबल आइएमई क्यापिटललाई १ करोड ६२ लाख इकाइ सुरक्षित गरिनेछ ।

यसरी बाँकी रहेको १० करोड २० लाख इकाइ सर्वसाधारणका लागि बिक्री गरिनेछ । लगानीकर्ताले न्यूनतम १०० इकाइदेखि अधिकतम १ करोड २० लाख इकाइसम्म आवेदन दिन पाउनेछन् ।

बन्दमुखी यस योजनाको कुल निष्कासनमध्ये बिक्री अवधिभर न्यूनतम बिक्री हुनुपर्ने ६ करोड वा कुल बिक्री हुनुपर्नेछ । बिक्री हुन नसकेमा योजना खारेज गरी १५ दिनभित्र आवेदकको रकम फिर्ता गरिनेछ ।​

क्याटेगोरी : समाचार
ट्याग : #‘ग्लोबल आइएमई समुन्न योजना–२’ को इकाइमा आवेदन दिने म्याद थप, #breaking

---

---

---