काठमाडौं । भक्तपुरको गुण्डुस्थित काठमाडौं वर्ल्ड स्कूलको विद्यार्थीको मोबाइलमा गएको प्रश्नपत्र मोडल प्रश्न भएको अनुसन्धान टोलीले निष्कर्ष निकालेको छ । प्रहरी र राष्ट्रिय परीक्षा बोर्डको आइटीको अनुसन्धान टोलीले गरेकाे छानविनकाे क्रममा परीर्थीको मोवाइलमा आएको प्रश्नपत्र मोडल भएको निष्कर्ष निकालेको हो ।

काठमाडौं वर्ल्ड स्कूलले कक्षा १२ को प्रश्नपत्र आउट गरेको आरोप लागेपछि जिल्ला प्रशासन कार्यालय र राष्ट्रिय परीक्षा बोर्डले काठमाडौं वर्ल्ड स्कुलको परीक्षा केन्द्र चानक्य कलेजमा पुगेर छानविन सुरु गरेको थियो । परीक्षा सुरु हुनु अघि नै विद्यार्थीको हातमा प्रश्नपत्र पुगेको सूचना पाएपछि सीडीओ गोपालप्रसाद अर्यालसहितको टोलीले अनुगमन गरेको थियो ।

प्रहरी र एनइबीको आइटीको अनुसन्धान टोलीले छानविन गरेको थियो । सोही अनुसन्धान टोलीले घटनाको छानविनपछि विद्यार्थीको मोवाइलमा आएको प्रश्न मोडल भएको पाइएको सीडिओ अर्यालले बताए ।

 

उनले भने,‘ अनुसन्धान टोलीले विद्यार्थीको मोवाइलमा आएको प्रश्न र अहिलेको प्रश्न भिडाएर हेर्नुभएको थियो । दुईवटै प्रश्न हेर्दा नमिलेको देखियो । र बाहिरिएको प्रश्नपत्र भनिएको मोडल प्रश्न रहेको पाइएको छ ।’मोडल प्रश्नपत्र पनि परीक्षा अघि किन विद्यार्थीलाई पठाइयो भन्ने अर्को अनुसन्धानको पाटो हुने उनले बताए । त्यो विषयबारे पनि सोधपुछ भइरहेको उनले बताए ।

प्रहरीले विस्तुत रिपोर्ट बुझाएपछि मात्रै खुल्ने उनको भनाइ छ । उनका अनुसार अनुसन्धान टोलीले विद्यार्थीको मोवाइल जफत गरेर अनुसन्धान गरेको थियो ।

शिक्षा पत्रकार मकर श्रेष्ठले आइतवार विहानै कक्षा १२ को परीक्षा सुरु हुनुपूर्व नै काठमाडौं वर्ल्ड स्कूलका विद्यार्थीलाई प्रश्नपत्र आउट भएको सूचना फेसबुकबाट सार्वजनिक गरेका थिए ।

क्याटेगोरी : समाचार
ट्याग : #breaking, #प्रश्नपत्र आउट प्रकरण– मोडल प्रश्न काठमाडौं वर्ल्डका विद्यार्थीको मोबाइलमा गएको अनुसन्धानको निष्कर्ष

---

---

---