११५ औं अन्तर्राष्ट्रिय महिला दिवसको अवसर पारेर नागार्जुन नगरपालिकाद्वारा नगरपालिका भित्र बसोबास गर्ने महिला उद्यमीहरु बाट उत्पादित सामानहरुको स्टल, प्रदर्शनी तथा बिक्री मेला आयोजना गरेको छ ।

नागार्जुन नगरपालिका वडा नं. ४ मा अवस्थित ताम्राकार कम्प्लेक्सको पार्किङ ग्राउन्डमा आयोजित मेलाको उद्घाटन गर्दै नगरपालिकाका कार्यवाहक नगर प्रमुख शुशिला अधिकारीले महिला दिदिबहिनीहरुलाई आयआर्जनमा जोड्नु पर्छ भन्ने मुख्य उदेश्यका साथ यो मेला आयोजना गरिएको बताउनुभयो ।

महिला उद्यमीहरुद्वारा उत्पादन गरिएका कृषिजन्य उत्पादन,सौन्दर्य सामग्री, हस्तकलाका सामान, बेकरी उत्पादन, सरसफाइका सामाग्री, टेलरिङ्ग, खाद्यान्न सामग्री लगाएतका उत्पादनहरुको ३० भन्दा बढी स्टल मार्फत प्रदर्शनी गरिएको छ ।

प्रमुख प्रशासकीय अधिकृत शिव प्रसाद रिजालले यस्ता किसिमका प्रदर्शनीहरुले उद्यमी महिलाहरुलाई प्राबिधिक सहयोग, वस्तुगत अनुदान जस्ता नगरपालिकाले प्रदान गर्ने सहयोग प्रदान गर्न समेत मार्ग प्रसस्त हुने बताउनुभयो ।

मेला फागुन २१ देखि २३ सम्म ३ दिन चल्ने छ ।

क्याटेगोरी : समाचार, स्थानीय

---

---

---