काठमाडौँ, माघ १४ गते । नेपाली कांग्रेस संसदीय दलको बैठक नयाँ बानेश्वरस्थित कांग्रेस संसदीय दलको बैठकमा सुरु भएको छ ।

संसदीय दलका नेता तथा नेपाली कांग्रेसका सभापति शेरबहादुर देउवाको अध्यक्षतामा सुरु भएको बैठकमा दलका सांसदहरु सहभागी हुनुहुन्छ ।

माघ १८ गतेदेखि संघीय संसद्को बैठक सुरु हुन लागेकाले त्यसको तयारीका लागि आइतबारबाट दलको बैठक बसिरहेको छ ।

नेपाली कांग्रेसले पार्टीभित्र साझा धारणा बनाएर संसद्को आगामी अधिवेशनमा प्रस्तुत हुने गरी छलफल अघि बढाएको छ । कांग्रेस संसदीय दलको आइतबारबाट सुरु भएको बैठकमा सरकारले ल्याएको अध्यादेश,संसदमा विचाराधीन विधेयकसहित सबै विषयमा वैचारिक एकरूपता ल्याउने गरी छलफल अघि बढाएको छ ।

कांग्रेस संसदीय दलका प्रमुख सचेतक श्यामकुमार घिमिरेका अनुसार संसदीय दलको बैठकबाट संसदमा प्रस्तुत गर्ने विषयबारे प्रस्ट मार्गचित्र बनाइने छ । उहाँले भन्नुभयो, “पार्टीभित्र बहस हुन सक्छ । नेतृत्वको आलोचना गर्न पाइन्छ । तर पार्टीको बैठकले जे निष्कर्ष दिन्छ, त्यो निर्णय सबैले स्वीकार गर्नुपर्छ, अपनत्व लिनु पर्छ । कार्यान्वयनप्रति जबाफदेही हुनु पर्छ । त्यसैले बैठकमा बहस गरेर सहमतिकै आधारमा निर्णय गरी साझा धारणा बनाएर जाने विषयमा छलफल केन्द्रित छ ।”

क्याटेगोरी : समाचार
ट्याग : #नेपाली कांग्रेस संसदीय दलको बैठक सुरु

---

---

---