शहीदको योगदान सम्झिँदै सुनिता डंगोलले भनिन्- हरेक पुस्ताले इतिहासको कदर गर्नुपर्छ

साझापाना २०८१ माघ १० गते १४:०५ मा प्रकाशित

काठमाडौं । मुलुकमा प्रजातन्त्र स्थापनाका लागि आफ्नो जीवन उत्सर्ग गरेका शहीदहरूको सम्झनामा विहीबारदेखि शहीद सप्ताह सुरू भएको छ ।

काठमाडौं महानगरपालिकाको समन्वयमा प्रत्येक वर्ष माघ १० देखि १६ गतेसम्म अमर शहीदलाई स्मरण गरी शहीद सप्ताह मनाउने गरिन्छ ।

शहीद सप्ताहको पहिलो दिन विहीबार शुक्रराज शास्त्रीलाई प्राणदण्ड दिइएको टेकुस्थित उहाँको सालिकमा माल्यार्पणका साथ श्रद्धाञ्जली अर्पण गरिएको छ ।

शुक्रराज शास्त्रीको शालिकमा माल्यार्पण गर्दै काठमाडौं महानगरकी उपमेयर सुनिता डंगोलले शुक्रराज शास्त्रीले जनअधिकार प्राप्तिका लागि गरेको त्याग र नेपालको साहित्यिक क्षेत्रमा गरेको योगदानको स्मरण गरिन् ।

उनले भनिन्, ‘शहीद सप्ताह मनाइरहँदा उहाँहरूको योगदान र जीवनबाट सिक्नुपर्ने पाठलाई स्मरण गर्नुपर्छ । हरेक पुस्ताले इतिहासको कदर गर्नुपर्छ । जसरी हामी अहिले स्वतन्त्रताको महसुस गरिरहेका छौं त्यो उहाँहरूकै योगदानको देन हो ।’

विक्रम संवत् १९५० मा वनारसमा जन्मनुभएका शुक्रराज शास्त्री धार्मिक गतिविधिमार्फत जहानियाँ शासनविरुद्ध जागरण अभियानमा सक्रिय थिए । उनलाई काठमाडौंको इन्द्रचोकबाट पक्राउ गरी जेलमा राखिएको थियो ।

राणा सरकारले उनलाई १९९७ माघ १० गते टेकु पचलीस्थित खरीबोटमा झुण्ड्याएर मृत्युदण्ड दिएको थियो । देशका लागि जीवन बलिदान गर्ने शहीदहरुप्रति सम्मान व्यक्त गर्दै हरेक वर्ष माघ १६ गते शहीद दिवस मनाइन्छ ।

क्याटेगोरी : समाचार
ट्याग : #शहीदको योगदान सम्झिँदै सुनिता डंगोलले भनिन्- हरेक पुस्ताले इतिहासको कदर गर्नुपर्छ