सार्क सम्मेलनबारे आरजुलाई जयशंकरको प्रश्न- तिम्रो देशमा आएर मान्छे मारेको भए के हुन्थ्यो ?

काठमाडौं । भारतले सार्क बैठक राख्न नचाहेको तथ्य सार्वजनिक गर्दै परराष्ट्र मन्त्री डा. आरजु राणा देउवाले भारतीय समकक्षी एस जयशंकरले आफूसमक्ष राखेको प्रश्न संसदीय समितिमा सुनाएकी छन् ।

प्रतिनिधिसभा अन्तर्राष्ट्रिय सम्बन्ध समितिमा उपस्थित भएकी मन्त्री राणाले सांसदहरूको प्रश्नको जवाफ दिने क्रममा सार्क बैठक राख्न निरन्तर पहल गरेपनि भारत-पाकिस्तान तनावका कारण सम्भव नभएको बताएकी हुन् ।

उनले आफूसँग भारतीय समकक्षीले राखेको प्रश्न सुनाउँदै भनिन्, ‘अध्यक्षको हैसियतले हामीले प्रयास नगरेको होइन । राष्ट्र प्रमुखहरूको शिखर बैठक बस्न सबै पक्ष सहमत हुनुपर्छ । यहि सेप्टेम्बरमा मैले भारत जाँदा सार्कको विषय उठाएको थिएँ तर उता जयशंकरजीले तिम्रो देशमा आएर मान्छे मारेको भए मिटिङ हुन्थ्यो ? भनेर प्रश्न गरेपछि मैले जवाफ दिन सक्ने अवस्था रहेन ।’

भारतले पाकिस्तान समर्थित आतंकवादीले आफ्नो देशमा मान्छे मारेको भन्दै सार्क शिखर सम्मेलनमा बस्न अश्वीकार गर्दै आएको छ । मन्त्री राणाले नेपालको तर्फबाट प्रयास भने जारी रहेको बताइन् ।