‘नागरिकका जनजीविकाका सवालमा केन्द्रित छौं’

नेपाली कांग्रेस कर्णाली प्रदेश संसदीय दलका नेता जीवन बहादुर शाहीले नागरिकका जनजीविकाका सवाललाई केन्द्रित गरेर काम गरिहेको बताउनुभएको छ । प्रेस युनियन सल्यानले जिल्लाको खलंगामा आयोजना गरेको कार्यक्रममा उहाँले यस्तो बताउनुभएको हो ।

काम गर्न खोजिरहेको अवस्थामा पटकपटक सरकार फेरबदल भैरहने हुँदा नागरिकले सोचे अनुसार काम गर्न नसकेपनि जनताको जिवनस्तर उकास्ने काममा कटिवद्ध भएर लागिरहेको बताउनुभयो ।

प्रतिनिधि सभा सांसद तथा कर्णाली प्रदेशका पूर्व मुख्यमन्त्री समेत रहनुभएका शाहीले अझैपनि जनताका समस्या राज्य सँग पुग्न नसकेकाले यी सवाललाई केन्द्रित गरेर काम गरिरहेको बताउनुभयो । उहाँले भन्नुभयो, “जनताको काम गर्नको लागि तीन तहको सरकार छ, केन्द्रमा सरकारले गति लिइरहेको छ, त्यति निराशाजनक छैन, सबै गरिसक्यौं भन्ने होइन, पहिलेको तुलनामा अहिले केही विकास भएको छ । प्रयास जारी छ । ठुला योजनामा संघ सरकारले काम गर्नुपर्ने र सार्वजनिक महत्वका बिषयमा प्रदेश र स्थानीय तहले  ध्यानमा राखेर काम गरिरहेको बताउनुभयो ।

संघ र प्रदेश सरकार भन्दा स्थानीय तहको भूमिका बढी हुने भएकाले भइरहेका विकास निर्माणका योजनामा सम्पन्न गर्नमा स्थानीय सरकारले ध्यान दिनुपर्ने बताउनुभयो ।  उहाँले भन्नुभयो, प्रदेश सरकारलाई अधिकार सम्पन्न नवनाए प्रदेश तहको औचित्य पुस्टि गर्ने चुनौती बढेको छ ।

नेता शाहीले भुकम्पको पुननिर्माणका लागि सरकार गम्भिर भएर लागि परेको बताउनुभयो । भुकम्पबाट क्षति भएका बिद्यालय र स्वास्थ्य संस्था निर्माणका लागि कर्णाली प्रदेश सरकारले तिन जिल्लामा बजेट पठाएको बताउनुभयो ।

अर्को प्रसङ्गमा वाइडवडी काण्डमा बिना प्रमाण मुद्धा खेप्नु परेकाले ढिलै भएपनि आफुले न्याय पाएको बताउनुभयो ।